1 Day To Go In Xiaomi Mi Max 3 Launch: Everything We Know So Far

Xiaomi ye baat confirm kar chuki hai ki 19th July ko China mein Mi Max 3 launch hoga jiska samay 7.30pm CST hai (India ke according sham ke 5.00 baje). Halaanki kaafi samay se is smartphone se jude rumors aa rahe aur dheere dheere kaafi hadd tak features reveal ho chuke hain. Aaiye aaj aapko bataate hain kal launch hone waale Mi Max 3 se judi saari khabarein.

Sabse pehle baat karte hain colors ki, jo ki kal hi company ke President dwara reveal kiye gaye. Mi Max 3 Black, Blue aur Gold colors mein launch hoga. Iske alawa kuch hi dinon pehle aaye teaser mein ye bhi confirm ho chuka hai ki ismein 5500mAh ki battery hogi.

TENAA certification ke dauraan bhi, ye saaf dekha jaa chuka hai ki ye metal unibody ke saath aayega jismein front par screen aur thin bezels hain. Saath hi rear panel par vertically design kiye huye cameras aur fingerprint sensor moujood hai.

Iske alawa specs ko lekar aa chuke hazaaron rumors ke baad aaj company khud hi is smartphone ke features disclose karti nazar aayi hai.

Mi Max 3 mein 6.99-inch ki full HD+ 2.5D curved glass display hogi jo 18:9 aspect ratio ke saath aayegi. Halaanki ismein Corning Gorilla Glass protection milti hai ya nahin, ye kal hi pata chalega. Iske alawa is smartphone ko power dene ke liye company ismein Octa Core Qualcomm Snapdragon 636 processor de rahi hai jiski clock speed 1.8 GHz hogi.

Mi Max 3 two storage version mein launch hoga jinmein 4GB RAM ke saath 64GB storage version aur 6GB RAM ke saath 128GB internal memory variant shaamil hai. Is handset mein 12 MP ka primary rear camera, Sony IMX 363 sensor, Dual pixel focus, LED flash aur 5 MP secondary rear camera ke saath diya gaya hai. Saath hi selfies click karne ke liye aapko ismein 8 MP ka camera milega jismein flash light bhi aayegi.

Is dual SIM based smartphone mein 5500mAh ki badi battery ke saath Qualcomm Quick Charge 3.0 fast charging support bhi hai. Iske alawa ismein fingerprint scanner bhi moujood hai jo back cover par fit kiya gaya hai.

Mi Max 3 mein bhi aapko AI support milta hai. Iske camera mein bhi AI features hain jo 206 scenes ko detect kar sakte hain, saath hi AI voice assistant aur AI face unlock jaise features bhi aapko yahaan par milne waale hain. Ye handset MIUI 10 ke saath launch hoga jo Android 8.1 Oreo OS par based hai.

Isi ke saath ye kehna bilkul sahi hai ki kal launch hone waale is smartphone ko lekar jo bhi rumors aaye hain, unmein se lagbhag sabhi sahi prove huye hain.

Saath hi Mi Max 3 ke price ka hint dete huye company ne ek amount mention kiya hai jismein second digit blank hai 1_99 yuan. Ab ye second digit kya hai, ye to kal hi pata chalega. Isi ke saath ek aur rumors jo aa raha hai wo ye hai ki is smartphone ka ek aur variant bhi launch ho sakta hai jismein haal hi mein launch hua Qualcomm ka mid-range Snapdragon 710 chipset moujood ho. Ab ye kitna sahi hai, ye to kal hi pata chalega.

Facebook Comments

Recommended For You

About the Author: Pooja Choudhary

Leave a Reply

Your email address will not be published.

%d bloggers like this: