Xiaomi Mi A2 Vs Honor Play Detailed Comparison: Aapki First Choice Kya hai ?

Xiaomi ka latest smartphone Mi A2 finally launch ho chuka hai, lekin is baar Xiaomi kahin na kahin apne fans ki ummidon par khara nahin utar paya. Bawajood iske, ki ismein kaafi features hain, logon ko Mi A2 mein bahut si kamiyaan nazar aa rahi hain. Aur isi wajah se same price range mein kuch hi dinon pehle launch huye Honor Play ko log isse behtar maan rahe hain.

Lekin waakyi mein Mi A2 behtar hai ya Honor Play ? Agar aapko dono mein se koi chunna pade to aap kya purchase karenge ?

Aaiye dekhete hain Mi A2 aur Honor Play ka detailed comparison.

Design and Build Quality

Mi A2 mein design mein kuch naya nahin hai, wahi purana Xiaomi ka design hai aur bahut hadd tak aapko ye Redmi Note 5 Pro jaisa hi lagega. Lekin aluminium rear panel ke saath ye kaafi slippery bhi hai. Top and bottom bezels thick hain, jabki side bezels thin hain. 18:9 display ke upar aapko front camera, flash aur sensors milte hain. Power button aur volume rocker aapko right side par hi milte hain aur left edge par SIM tray hai. USB Type-c port aur speaker grill bottom edge par di gayi hai.

Doosri taraf Honor Play bhi metallic body ke saath hi aayega, lekin ye itna bhi slippery nahin hai. Iske edges round hain. But yes yahaan aapko 19.5:9 ratio ke saath display milti hai, yaani ki Mi A2 ke comparison mein thin bezels hain aur notch bhi present hai jismein front camera fit kiya gaya hai. Iske bottom edge par USB type-c port aur speaker ke saath 3.5mm audio jack bhi moujood hai, jo ki Mi A2 ke comparison mein iska + point hai. Ismein bhi aapko power button aur volume rocker right edge par hi milega.

Display

Xiaomi ke Mi A2 mein 5.99 inch ki display hai, jabki Honor Play mein 6.3-inch ki display hai. Dono mein full HD+ resolution hi milta hai aur IPS LCD screens di gayi hai. Lekin Honor Play mein 19.5:9 display hone ki wajah se ye ek compact device hai, even length mein Mi A2 se slightly small hi hai. Mi A2 ki length 158.7mm hai, jabki Honor Play ki 157.91mm hai. Thinner bezels ke saath aapko thodi jyada display Honor Play mein mil jaati hai.

Halaanki colors aur viewing angles dono mein hi achhe hain, lekin sunlight visibility ke maamle mein Mi A2 thoda peeche reh jaata hai. Lekin Mi A2 mein aapko display par Corning Gorilla Glass 5 shield nbhi milti hai, jo ki Honor Play mein nahin hai.

Processor

Mi A2 mein Octa Core Qualcomm Snapdragon 660 chipset hai, Honor Play aapko Octa-Core Huawei Kirin 970 processor offer karta hai, wo bhi GPU Turbo ke saath. Abhi tak Kirin 970 chipset kewal Huawei aur honor ke flagship devices mein hi aaya karta hai, lekin ab India mein ye aapko is price range mein bhi mil raha hai. Zaahir hai ki agar Honor Play gaming focuses smartphone hai, to processor bhi company ne usi ke according diya hai. Halaanki Mi A2 mein Snapdragon 660 se bhi aapko koi shikayat nahin hogi, but comparatively kirin 970 chipset jyada powerful hai aur aapko behtar aur fast performance deti hai.

Doosri taraf, Mi A2 mein Stock Android hai jo ki achha hai, lekin ismein customize options bahut limited hai, for example Back button left side me hai, jabki indians ise right side me prefer karte hain aur bhi isi tarah ki kayi limitations hain.

Honor Play mein EMUI 8.2 hai jo Android 8.1 Oreo par based hai. Lekin ye bhi stock Android se bahut jyada alag nahin hai. Ismein bhi aapko achha interface, streamlined app section, notifications, etc. sab easily aur sorted out milta hai. Lekin phir bhi Stock Android jitna perfect nahin hai.

Camera

Yahaan ye to bilkul clear hai ki agar aap camera lover hain, to Mi A2 hi better choice hai, ismein aapko 12 + 20 MP ka dual rear camera setup milta hai jo kaafi achhi aur detailed pictures deta hai. Ismein LED flash light, f/1.8 aperture aur Sony IMX486 sensor jaise features bhi hain. Iske main camera large pixels ke saath kaam karega, jabki secondary one low-light mein improved clicks offer karega.

Mi A2 ka selfie camera bhi aapko kaafi achhi details aur natural color ke saath pictures offer karta hai. Dono hi rear aur front camera ke portrait shots bhi kaafi decent hain.

Wahin Honor Play ka processor bhale hi kaafi powerful hai, lekin camera ke maamle mein ye Mi A2 se thoda peeche hai. Still, ye bhi aapko achhi images offer karta hai aur ismein aapko 16 + 2 MP ka dual rear camera setup ‘AI camera’ feature ke saath bhi milta hai. AI camera kewal objects hi detect nahin karta, balki natural light aur right amount of color ke saath tasveerein lene mein bhi helpful hai. Lekin iski low-light photography utni achhi nahin hai.

Front mein bhi aapko yahaan 16 MP snapper milta hai, lekin selfie utni achhi nahin hai.

Battery

Mi A2 mein 3000mAh battery di gayi hai, jo India mein Quick Charge 4.0 support ke saath aati hai, lekin is smartphone ke saath box mein jo charger aapko milta hai, wo standard hai aur aapke device ko charge karne mein lagbhag 2 ghante ka samay leta hai. Wahin Honor Play mein 3750mAh ki battery aapko fast charging support ke saath milti hai aur iski battery life Mi A2 se jyada bhi chalti hai aur jaldi bhi charge hoti hai. Saath hi ismein diya gaya GPU Turbo bhi gaming ke dauraan battery life ko boost karne mein helpful hai.

Price And Availability

Xiaomi Mi A2 ka sirf 4GB RAM + 64GB ROM version launch kiya gaya hai jiska price 16,999 INR hai aur iski first sale 16th August ko hogi. Iske pre-orders kal se hi Amazon aur Mi.com par start ho jayenge.

Honor Play ke India mein two version available hain:

4GB RAM with 64GB internal storage ka price 19,999 INR hai.

6GB RAM with 128GB ROM variant ka price 23,999 INR hai.

Ye dono version bhi Amazon exclusive hain aur 6th August se hi sale ke liye available bhi hain.

Verdict

Xiaomi ka Mi A1, Android One ke saath ek achha experience tha aur uska price bhi kaafi competitive tha. Us samay mein India mein wo kaafi popular hua aur Mi A2 se logon ki expectation aur bhi badhi. Lekin aaj Mi A2 jis price par launch hua hai, wo logon ko slightly overpriced lagta hai. Saath hi ismein headphone jack, microSD card slot aur less-visibility in sunlight jaisi kamiyon ne logon ko thoda aur niraash kiya hai. Lekin iska camera saari kamiyon ko poora karta hai.

Wahin Honor Play mein 19.5:9 display, Kirin 970 chipset, GPU Turbo aur 3750mAh battery jaise features is eek behtar phone banaate hain.

Facebook Comments

Recommended For You

About the Author: Pooja Choudhary

Leave a Reply

Your email address will not be published.

%d bloggers like this: