Xiaomi 14 March Ko India Mein Launch Karega Naya Smartphone, Redmi 5 Aane ki Ummid

Xiaomi India mein tezi se expand karta nazar aa raha hai. Is saal ka khaata India mein unhone Redmi Note 5 aur Redmi Note 5 Pro ke saath khola jo pichle mahine launch huye aur kal unhone Mi TV 4A bhi kewal 13,999 INR ke starting price mein launch kiye. Is TV ko ek live streaming video dwara launch kiye gaya jiske last ke kuch minutes mein ek smartphone ka teaser tha jise company 14 March ko India mein launch karne jaa rahi hai aur lagbhag ye baat tay hai ki ye smartphone Redmi 5 hai.

Darasal, teaser mein dikha smartphone ka design aur rumors sabhi is taraf ishara kar rahe hain ki ye smartphone Redmi 5 hai, jise December mein China mein launch kiya gaya tha. Is budget smartphone ke saath company ka trio bhi poora ho jayega aur is trio mein ab budget se lekar mid-range tak ke smartphone honge – Redmi 5, Note 5 aur Note 5 Pro.

Ummid hai ki Redmi 5 ki kimat lagbhag 7,999 INR hogi aur ye Black, Blue, Gold aur Rose Gold colors mein India mein available hoga. Is smartphone mein 5.99 inch ki HD+ full view display hai aur ye 2.0 GHz Octa Core Qualcomm Snapdragon 625 14nm processor par chalega. Is smartphone ko China mein 2GB, 3GB aur 4GB RAM variants mein announce kiya gaya tha aur inke saath storage 16GB, 32GB aur 64GB di gayi hai. Halaanki India mein inmein se kaun se variants launch hone waale hain, ye abhi nahin kaha jaa sakta.

Redmi 5 mein full view display ke saath 4000mAh ki badi battery bhi milti hai aur saath hi is hybrid dual SIM slot waale smartphone mein fingerprint scanner bhi diya gaya hai. Redmi 5 ka rear camera 12 MP ka hai jiske saath dual tone LED flash, f/2.2 aperture aur PDAF jaise features hain. Iske alawa iska front camera 5 MP ka hai aur uske saath bhi aapko LED flash di jaa rahi hai.

Iske alawa iska exact price kya hoga aur company iske kitne version India mein laa rahi hai, is baat ki information 14 March ko hi milegi.

Facebook Comments

Recommended For You

About the Author: Pooja Choudhary

Leave a Reply

Your email address will not be published.

%d bloggers like this: