Why Xiaomi is India’s No. 1 Smartphone Brand?

India mein har saal cores ki ginti mein smartphones kharide jaate hain. Aur pichle kuch saalon se to badalti technology aur affordable segment mein launch huye naye smartphones ne logon ka dhyaan is taraf kaafi khincha hai. Jahaan affordable segment mein pehle Samsung India mein top brand tha, wahin Xiaomi ke aane ke baad smartphone market mein kaafi kuch badala.

Pehle log sirf brand dekhte the, chipset par jyada kisi ka dhyaan nahin tha aur camera bhi pehle kuch khaas importance nahin rakhta tha. Lekin pichle kuch saalon mein smartphones mein powerful chipset, better camera aur huge battery logon ki priority ban chuki hai aur Xiaomi ne aane ke baad, smartphone market ka competiton aur bhi badh gaya.

2017-2018 mein agar affordable smartphones ki baat karein, to logon ko ab kewal Xiaomi ke hi smartphones dikhte hain. Is Chinese company ne, Indian smartphone market mein kaafi kam samay mein apni achhi pakad hi nahin banaayi, balki ye No.1 smartphone brand ban chuki hai. Lekin kya kaaran hai ki Xiaomi India mein No.1 aur most popular smartphone brand hai?

Kya aapne kabhi socha hai ?

Aaiye is sawaal ka jawaab dhoondhte hain.

Xiaomi ne jab se India mein kadam rakha, tabhi se wo aggressive price par powerful features ke saath smartphones launch kar rahi hai. Lekin ek yahi kaaran nahin hai, ki ye company no. 1 ban baithi hai.

Better Chipsets

Xiaomi ne aane se pehle koi bhi company yahi soch kar handsets deliver kar rahi thi, ki chipsets par logon ka kuch khaas dhyaan nahin hai, isiliye design achha, aur chipset average, aise hi smartphones market mein aaye aur waakyi mein logon ne is taraf kuch khaas dhyaan nahin diya.

Lekin Xiaomi ne Indians ki soch ko underestimate nahin kiya aur yahi sochkar better chipsets ke saath phones launch kiye, ki logon ko inki achhi knowledge hai aur affordable segment mein bhi smartphone ki achhi performance matter karti hai.

Xiaomi, India mein wo pehli company hai, jisne budget aur affordable range ke handsets mein aapko best chipset dene ki koshish ki hai.

Iske alawa Xiaomi ki MediaTek ke saath jo bhi problem rahi, uske chalte, Indian market mein MediaTek chipsets ke saath phone launch karna, Xiaomi ke liye ban kar diya gaya aur kahin naa kahin, ye is Chinese company ke liye blessing prove hui. Us samay mein jab koi bhi budget handsets mein Qualcomm ke chipsets nahin de raha tha, Xiaomi ko unhi ko use karna pada aur unke saath smartphones ki performance waakyi achhi rahi.

Saath hi competitive price par is company ke design ke saath bhale hi thoda compromise kiya ho, lekin phone ki performance yaani ki chipset ke saath kabhi koi compromise nahin kiya. Yahi kaaran hai ki Xiaomi ke phones, budget smartphones mein no. 1 saabit huye.

Time Is Everything

Jis samay Xiaomi ne India mein kadam rakha, us samay online aur offline market mein clear differentiation tha. Bahut kam smartphones exclusively online available hote the, aise mein is company ke budget smartphones kewal online hi available the. Saath hi ye smartphone offline market mein already available apne competitor smartphones se cheaper the. Us samay Vivo aur Oppo ka focus bhi offline market ki taraf hi jyada tha. To Xiaomi ko online compete karne waale handsets, naa ke barabar the.

Iske alawa us samay mein ek aur smartphone maker LeEco ne bhi India mein online market mein entry le li, jo ki Xiaomi ka seedha aur strong competitor ban baitha, lekin 1-2 smartphones ke baad, is company ka India mein ‘the end’ ho gaya aur phir se online market mein Xiaomi ek akeli company thi, jo budget smartphones mein best thi.

LeEco ke jaane ke baad, 1 se 2 saal tak Xiaomi ko online compete karne ke liye koi brand nahin tha aur Vivo aur Oppo ne bhi online market mein kaafi samay naad kadam rakha, jab tak Mi aur Redmi phones ko India mein kaafi pasand kiya jaane laga tha.

Xiaomi ko online market mein apna dominance banaane ke liye, poora 1-2 saal ka poora samay mila, aur iske baad hi Xiaomi ne India ke offline market mein khud ko expand karne ke baare mein socha. Aaj is company ki India mein online aur offline, dono markets mein achhi presence hai.

Good Camera Performance In Budget Phones

Xiaomi jab India mein enter hua, usne acche chipsets diye, lekin camera performance average hi hoti thi. Lekin badalte trend ke saath company ne apne smartphones ke camera ki performance par bhi achha kaam kiya Redmi Note 5 se Xiaomi ke phones ki camera performance mein bhi improvement nazar aayi.

Last year ke end se jab affordable segment mein kaafi achhe handsets launch hone lage aur competition badha, tabhi se Xiaomi ke phones mein cameras achhe aaye hain. Phir chahe hum Mi A2 ki baat karein ya is saal mein launch huye Redmi Note 5 Pro, Mi A2, Redmi 6 Pro, etc. Ye sabhi phones apne price segment mein best cameras ke saath launch kiye gaye.

Realme ke aane ke baad, Xiaomi ka competition zaroor badh gaya. Jahaan 13-14K ki range mein Realme 2 Pro mein Snapdragon 660 ke saath achhi performance dene ki koshish ki hai. Wahin is price range mein best camera performance kewal aapko Mi aur Redmi ke phones hi de rahe hain.

Software

Xiaomi ke phones mein aapko kaafi achha aur light software milta hai. Aaj se 2 saal pehle ki baat karein, to Samsung ke smartphones mein company ka jo apna software aata tha, wo heavy hota tha aur lag karta tha. Wahin Vivo aur Oppo ne kahin n kahin iOS se similar software diye hain. Jabki is Chinese company software relatively well designed aur mature rahe hain.

Darasal, Xiaomi, phones launch karne se pehle, ek software company bhi hai, aur softwares ko lekar inhein kaafi achhi knowledge bhi hai. Isiliye inke softwares light, useful aur mature hain. Halaanki Xiaomi aapko Android update jyada nahin deti, lekin time par aapko MIUI update diye jaate hain.

Iske alawa jin logon ko stock Android phones pasand hain, unke liye company ne Mi A1 ke saath sabse pehle Android One smartphone bhi launch kiya. Google ka Android One project jo kahin naa kahin thanda pad chuka tha, use India mein dobara se Xiaomi ne hi shuru kiya aur iske baad, Infinix, Motrola, aur Nokia jaisi companies ke Android One smartphones launch huye.

Customer support

Is company ne kewal phones par hi dhyaan nahin diya, balki dheere dheere India mein apne customer support ko bhi better kiya hai. India mein 600 cities mein

Is Chinese company ke 1000 se jyada service centers hain. Saath hi company ka maanna ye hai ki after sales ek most important function hai, jis par dhyaan dena zaroori hai. Isiliye Xiaomi ka service network kaafi strong hai, jismein 6,000 se jyada employees hain aur ye company ki second biggest workforce hai, jo India mein hai.

Facebook Comments

Recommended For You

About the Author: Pooja Choudhary

Leave a Reply

Your email address will not be published.

%d bloggers like this: