August 2018 Mein India Mein Launch Hone Jaa Rahe Hain Ye Exciting Smartphones

August ke is month mein kaafi important launches hone waale hain, jinmein se jyadatar smartphones ke hain. Is month mein budget smartphone se lekar flagship smartphones tak kayi handsets ke launches shaamil hain aur lagbhag sabhi leading companies bhi.

India mein bhi is month mein aapko kaafi naye smartphones nazar aayenge, jinke details hum neeche share kar rahe hain.

Xiaomi Mi A2

Xiaomi ka Mi A2 August 8 ko India mein launch hone jaa raha hai. Company iske 4GB RAM + 64GB ROM aur 6GB RAM + 128GB storage versions India mein launch karegi. Iska global launch bhi haal hi mein Spain mein hua hai aur is Android One smartphone mein aapko 5.99-inch ki full HD+ display, 12 + 20 MP ka dual rear camera setup, fast charging ke liye Quick Charge 4.0 support, 20 MP front camera aur Snapdragon 660 chipset jaise specs milne waale hain.

Samsung Galaxy Note 9

Samsung bhi apne latest flagship smartphone Galaxy Note 9 ko Galaxy Unpacked event mein August 9 ko launch karne waali hai. Rumors ke according, Galaxy Note 9 mein 6.4-inch ki QHD+ Super AMOLED display, Snapdragon 845 (globally) / Exynos 9820 chipset (Indian version), 4000mAh battery, 512GB tak ki storage, wireless fast charging support jaise features honge. Saath hi iske global launch ke two-three weeks ke baad hi ye India mein launch ho sakta hai, yahaan ye aapko Amazon aur Flipkart dono retail sites par milega. Expect kiya jaa raha hai ki iski sale bhi 24th August se start ho jayegi.

Oppo F9 Pro

Oppo jaldi hi apne naye smartphone F9 aur F9 Pro ko China mein launch karne jaa raha hai aur saath hi Oppo India ne F9 Pro ke India launch ki announcement bhi kar di hai aur iske teasers bhi aane shuru ho gaye hain, jinmein F9 Pro ke colors, horizontally designed dual rear cameras, water resistance, VOOC fast charging jaise features confirm kiye gaye hain. Is handset mein front par kaafi chota notch bhi hai, jismein kewal front camera fitted hai. Expect kiya jaa raha hai ki F9 Pro India mein Independence Day par reveal kiya jayega, lekin company ne exact date ki announcement nahin ki hai.

Moto G6 Plus

Moto G6 series sabse pehle April mein Brazil mein launch ki gayi thi aur unmein se Moto G6 Plus India mein launch hone jaa raha hai. Company ne abhi kewal G6 Plus ke India launch ki announcement ki hai, lekin baaki G6 series ke phones India mein iske saath hi aayenge ya nahin, ye kehna zara mushkil hai. Is smartphone ko bhi August mein hi launch kiya jaane waala hai, lekin date ki announcement abhi nahin hui hai. Ismein bhi aapko 5.7-inch FHD+ display, Snapdragon 450 chipset, 3GB / 4GB RAM, 32GB / 64GB ROM, 12 + 5 MP dual rear cameras, 16 MP front camera aur 3000mAh battery with Turbo charging support milte hain.

Nokia 6.1 Plus

Nokia 6X ka global version Nokia 6.1 Plus bhi India mein jaldi hi dastak dene waala hai, company ke official account se Twitter par post bhi share ki jaa chuki hai, lekin exact date ki announcement nahin ki gayi hai. Nokia 6.1 Plus ke launch event ko fans bhi ek contest jeetkar attend kar sakte hain. Iske specs ki baat karein to ismein bhi FHD+ display, Snapdragon 636 processor, 4GB RAM, 16 + 5 MP rear cameras, face unlock support, 3060mAh battery di gayi hai.

Facebook Comments

Recommended For You

About the Author: Pooja Choudhary

Leave a Reply

Your email address will not be published.

%d bloggers like this: