Toilet Aur Violation Jaise Social Issues Par Based Hai Mere Pyare Prime Minister Movie

Kaafi samay tak pending mein rehne ke baad aaj finally Mere Pyare Prime Minister movie release ho gayi hai. Yeh movie last year December mein release honi thi lekin kuch unknown reasons ki wajah se uss samay release nahi ki gayi. Jiske baad ise 8th March ke liye schedule kiya gaya lekin uss samay bhi iss movie ki releasing possible nahi ho  saki  thi. Yeh movie Mumbai ke slum area ki situation ko dikhati hai jahaan par life ki basic needs ki bhi kami hai. Iss kami mein ek toilet bhi shaamil hai jis se yeh poori kahaani judi huyi hai. Mere Pyare Prime Minister ek bachche aur uski maa ke story hai jise kaafi delicately dikhaya gaya hai.

Movie ke lead role mein aapko dikhai degi Anjali Patil, Om Kanojiya, Atul Kulkarni, Makrand Deshpande, Niteesh Wadhwa aur Rasika Agashe. Movie ko direct kiya hai Rakesh Om Prakash Mehra ne. Rakesh iss se pehle Rang De Basnti, Delhi 6, Bhaag Mikhaa Bhaag jaisi movies humein de chuke hain.

 

Movie mein ek bachcha hai jiska naam hai kanhaiya aka kannu. Ek single mother hai Sargam. Dono maa bete slum area mein ek choti si jhuggi mein rehte hain jahaan kisi bhi tarah ki suvidha available nahi hain, ek toilet bhi nahi. Gents ke liye yeh ek major problem na ho lekin wahaan ki ladies ko iss problem ko har roj face karna padta hain. Maa bete ke role mein sargam aur kannu ki bonding real life jaisi lagti hai, Dono tang haalat mein bhi apni jindagi khushi khushi kaat rahe hain. Jyadatar sabhi ladies group bana kar subah andhare mein ya raat mein toilet ke liye open area mein jaati hai lekin ek din sargam ko akele jaana padta hai. Uss andhere mein sargam ke saath kuch galat (violation) hota hai jiske baad yeh movie thodi serious ho jati hai.

 

Kanahiya apni maa ko insaaf dilaane ke liye nikalta hai jahaan use pata chalta hai ki desh ke Prime Minister hi uski maa ko justice dila sakte hain. Jiske chalte wah apni bhasha mein Prime Minister ko letter likhta hai, jismien shuruaati sabd hote hain Mere Pyare Prime Minister. Kanahiya ke dwara likhe gaye letter mein use kiye sabd kisi ke bhi man ko hila ke rakh sakte hain, jismein wah yeh bhi likhta hai ki agar aapki maa ke saath aisa hota to aap kya karte. Yeh letter le kar wah apne slum ke dosto ke saath Delhi Prime Minister ke office pahunchta hain. Jahaan uska letter PM office ke dwara receive to kiya jaata hai lekin kya yeh letter Prime Minister tak pahunch pata hai ya nahi aur kya kanhaiya ki maa ko insaaf mil paata hai, iske liye aapko theater mein jaa kar yeh movie dekhni padegi.

 

 

Movie ko Delhi  aur Mumbai ke real locations par shoot kiya gaya hai. Har kisi ki acting movie mein natural lagti hai. Movie mein bachchon ke muh se nikale dialogue aapko hasaane mein peeche nahi rehte hain. Saath hi Sargam ki neighbor ki roop mein Rasika Aghase bhi hasaane mein peeche nahi rahti hain. Yeh ek family movie hai jise social issue se jodte huye banaya gaya hai.

Facebook Comments

Recommended For You

About the Author: Prachi Kulshrestha

Leave a Reply

Your email address will not be published.

%d bloggers like this: