Tech News Of The Day – 14th June 2018

Hello Readers ! Aaj ki Tech News mein jahaan smartphones ko lekar kuch khaas nahin hua, lekin other products saamne zaroor aaye hain. Samsung ne naye features ke sath flagship TV range launch ki, Xiaomi ke Mi Ecosystem products India mein utaare, LG ki Q7 series ke price ka bhi khulaasa hua. Aaiye jaante hain yahi khabrein thodi detail ke saath.

Samsung New Range Of TVs

Samsung aaj India mein TVs ki nayi range launch ki jismein flagship QLED TV series bhi shaamil hain. Ismein S voice, ambient mode, jaise kayi naye features hain aur ye 55-inch se lekar 75-inch ke beech ke sizes mein available hain jinki starting price 2,45,000 INR hai. Iske alawa UHD TVs bhi launch ki gayin hain aur inki starting price 64,900 INR hai. Saath hi Smart Concert aur Joy Concert bhi is range mein shaamil hain jo 32, 43 aur 49 inches screen ke saath aayin hai aur 27,500 INR ke starting price ke sath market mein available hain.

LG Q7 and Q7+ price revealed

LG ne aaj Q7 aur Q7+ ko Korea mein launch kiya hai aur saath hi inka price bhi saamne aa gaya hai. In dono smartphones mein 5.5 inch ki full HD+ display hai aur Snapdragon 450 processor ke saath aaye hain. Q7 mein 3GB RAM aur 32GB storage hai ,saath hi 13 MP ka rear camera LED flash light ke saath diya gaya hai. Jabki Q7+ mein 4GB ki RAM, 64GB ki storage aur 16 MP ka auto focus rear camera moujood hai. Iske alawa inmein 5 MP ka front camera aur 3000mAh ki battery hai. Q7 ka price KRW 495,000 (approx. 31,000 INR) aur Q7+ ka KRW 570,000 (35,500 INR) hai.

LG Q7 aur Q7+ mein Snapdragon 450 CPU aur 3 / 4GB RAM ke according ye price thoda jyada hi lag raha hai.

Xiaomi Mi Ecosystems launched in India

Xiaomi ne India mein aaj apne 4 Mi Ecosystem products launch kiye hain jinmein Mi Rollerball Pen, Mi Travel U-shaped Pillow, Mi I Love Mi T-shirt and Mi Band 2 Charge Cable shaamil hain. Mi Rollerball Pen ki kimat Rs. 179 hai, Mi Travel U-shaped Pillow aapko 999 INR ke price par available hoga. Mi I Love Mi T-Shirt ko 399 INR ki kimat ke saath launch kiya gaya hai aur Band 2 charge cable ki kimat Rs. 129 hai. Ye sabhi products Xiaomi ke online store mi.com par aaj raat 12 baje se hi available hain.

OnePlus 6 1 million units sold

OnePlus 6 ko launch huye abhi kewal 22 din huye hain aur company 1 million device sale kar chuki hai. Company ki maanein to ye pehla OnePlus device hai jiski sale itni tezi se hui hai. Isi cheez ko celebrate karte huye company ne ‘Community Celebration Season’ bhi announce kar diya hai jo kal se yaani ki 15th June se 26 June tak chalega aur ismein customers ko naye offers bhi milenge.

Facebook Comments

Recommended For You

About the Author: Pooja Choudhary

Leave a Reply

Your email address will not be published.

%d bloggers like this: