Tech News Of The Day – 11th July 2018

Huawei Nova 3

Huawei ne apne naye smartphone Nova 3 ka launch event July 18 ko schedule kiya hai, lekin company ka ye naya smartphone aaj se hi V-Mall par pre-order ke liye available hai aur full specs ke saath official bhi ho chuka hai. Nova 3 mein 6.3-inch ki full HD+ display hai, Octa Core Kirin 970 processor par chalne waale is handset mein 6GB ki RAM aur 64GB / 128GB ki storage moujood hai. Ye handset EMUI 8.2 interface ke saath aayega jo Android 8.1 Oreo par based hai. Ismein 16 + 24 MP ka dual rear camera setup aur 24 MP ka front camera diya gaya hai. Halaanki iske pricing details ke liye humein 18th July ke launch event ka intezaar karna hoga.

Infinix Hot 6 Pro Launched

Infinix ka naya smartphone Hot 6 Pro aaj India mein 7,999 INR ki  kimat par launch ho chuka hai. Iski khaas baat ye hai ki ye smartphone aapko kewal 8,000 ki range mein dual SIM slots, dedicated microSD slot, 4000mAh ki battery aur dual rear cameras jaise features provide karta hai. Infinix Hote 6 Pro mein 5.99-inch ki HD+ display hai, Snapdragon 425 processor aur 4000mAh ki battery ke saath ye smartphone aapko kewal Flipkart se milega.

Tambo TA 4

Tambo jo ki ek nayi company hai aur India mein apne eight smartphones aur features phones ke saath April mein aayi hai, ne aaj apna naya TA 4 smartphone launch kiya hai jiski kimat 6,999 INR hai. Ismein 5.45-inch ki display, quad core MediaTek MT6737 processor, 8 MP ka rear aur 5 MP ka front camera aur 3000mAh ki battery jaise features shaamil hain. Tambo TA 4 aapko all over India mein sabhi leading distributors ke through available hoga aur saath hi company ne apne customers ko cashback offer dilaane ke liye Reliance Jio se bhi tie-up kiya hai.

Samsung Galaxy Note 9 press render leak

Samsung apne Galaxy Note 9 ko August 9, 2018 ko launch karne waala hai, ye baat to rumors mein pehle se hi hai, lekin haal hi mein leak huye press image se ye baat bilkul clear hai ki smartphone India mein usi din launch ho raha hai. Iske alawa image se ye bhi pata chalta hai ki Note 9 lagbhag Galaxy Note 8 ke jaisa hi hai. Yahaan tak ki inki displays aur side buttons bhi bilkul ek jaisi hi hain. Halaanki ye khabar achhi nahin kahi jaa sakti kyunki logon ko Note 9 mein naye design ki expectation zaroor rahi hogi.

WhatsApp New Feature

WhatsApp ne aaj ek naya feature launch kiya hai, jiske baad chatting aapke liye thodi easier hone waali hai. Darasal, ab WhatsApp mein aaye naye feature se aapko ye pata chal sakega ki jo message aapko mila hai wo particular sender ne create kiya hai, ya phir wo ek forwarded message hai. Agar ye message forwarded hai, to iske upar aapko forwarded likha hua dikhayi dega.

Facebook Comments

Recommended For You

About the Author: Pooja Choudhary

1 Comment

Leave a Reply

Your email address will not be published.

%d bloggers like this: