Smartphone Notch Evolution: Kyun Huye Itne Popular Aur Kya Ab Finally Jaane Waale Hain?

Notch ki kahaani sabse pehle Essential phone ne shuru ki, lekin iPhone X hi wo smartphone hai, jisse notch ka trend shuru hua. iPhone X mein notch display aane ke baad, lagbag sabhi Android smartphone makers ne bhi is trend ko apna liya. Lekin kya notches ka hona zaroori tha, iske peeche ka kaaran kya tha? Ya phir notch display sirf ek smartphone style hai? Aaiye jaante hain ki kaise shuru hua ye trend aur ab kahaan tak hai iska safar.

Kyun Shuru Huye Notch Display

Ab agar iPhones mein aane waale notch ki baat karein to yahaan par ye bataana zaroori hai ki iPhones mein notch kewal ek style ya look ke liye nahin di gayi hai, balki iPhones mein aane waale 3D face unlock ki poori machinery us notch ke peeche ka kaaran hai. Jabki Android phones mein notch ka trend shuru se hi design aur style ke liye raha hai aur yahi kaaran hai ki ab tak notches ke sizes badalte rahe hain. Lekin iPhones mein ye notches naa to abhi chote honge, naa hi inhein khatam kiya jaa raha hai.

Notches ka Evolution

OnePlus 6, jo ki ek flagship smartphone tha, jab usmein notch aaya, to us samay smartphone industry mein kaafi controversy chal rahi thi, ki notch ka kya future hai, ise smartphone trend ke taur par apnaana chahiye ya nahin. Aur bhi kayi sawaal saamne aaye jaise ki notch smartphone mein value add karte hain ya nahin, kyun Android smartphone ise apna rahe hain, etc.

Lekin us samay in sawaalon ke jawaab dhoondhne aur notch display par consumers ke approval se pehle hi industry is trend ke saath aage badh gayi. Baad mein industry aur community ne bhi notches ke saath aane waale smartphones ko accept kar hi liya, lekin phir bhi bahut saare logon ko notch accept nahin tha.

Last year ko smartphone industry mein aap notch year bhi keh sakte hain, lekin OnePlus 6 ke baad notches ke sizes vary honge lage. Bahut se smartphones wide notch se waterdrop notch ki taraf badhne lage aur logon ko ye naya waterdrop pasand bhi aaya.

Us samay premium se mid-range smartphones mein waterdrop notch aaye aur dheere dheere aaj entry level smartphones mein bhi waterdrop notch moujood hain. Yahi kaaran hai ki ye trend bahut common ho gaya, halaanki companies ne iske liye naam alag alag chune jaise ki dewdrop notch, Infinity –V / U display, waterdrop notch, etc.

Wahin bahut se smartphone makers ne notch ke saath saath settings mein use hide karne ka option bhi diya, lekin wo logon ko kuch khaas pasand nahin aaya. Jabki kuch companies ne notch to diya, lekin uske according software aur settings mein use optimize karne ka option nahin diya.

Iske baad December 2018 mein Huawei aur Samsung ne punch-hole selfie camera invent kiya, ye bhi ek tarah ka notch hi tha, jise Samsung ne Infinity-O display ka naam diya. Iske baad  aaj mid-range handsets mein jab pop-up selfie camera aane laga hai, to hum keh sakte hain ki shaayad notches ek passing trend ya fad hai, jo chala jayega.  Aur is year mein hum pop-up cameras ke saath kaafi smartphones dekhenge, jinmein se OnePlus 7 bhi ek hoga aur jo ye nahin dega, wo shayad apne smartphones ke liye punch-hole selfie cameras chunega.

Aane waale Display Trends; Kya notches jaa rahe hain?

Kuch samay pehle launch huye Oppo F11 aur F11 Pro mein pop-up selfie camera hai aur inka starting price around 20K hai. Iske alawa OnePlus 7 leaks se bhi ye saaf zaahir hai ki ismein bhi pop-up selfie camera aayega, jo consumer ko continous aur notchless full view display offer karte hain. Iske alawa Vivo V15 / V15 Pro mein bhi notchless display hi hai. In sabko dekhkar yahi lag raha hai ki is year ke khatm hote hote notch ka trend bhi khatm ho jayega.

Aur iske baad consumers jab notchless display ke saath use to ho jayenge, to aane waale smartphones mein company notch ki wapasi mushkil hi karegi.

Isi ke saath Samsung ne bhi aaj announce kiya hai ki wo upcoming smartphones mein camera ko display ke peeche hi shift kar degi aur is par wo already kaam kar rahi hai. Isse ye to pata chal hi jaata hai ki consumers hamesha se continous display hi chahte hain aur notches wahaan tak pahuchne ka shayad ek zariya raha hai aur ab hum lagbhag wahaan tak jab pahunch chuke hain to shayad notch hat hi jayenge.

Ab aise mein Oppo, Vivo, OnePlus aur Samsung jaise leaders hi notch se door jaa rahe hain, to aapko kya lagta hai, kya notch trend khatam ho raha hai? Ya phir continue rehne waala hai? Aise mein kya aap notch ke jaane se khush hain aur notchless continous display ko lekar aapka kya kehna hai? Comment section mein humein apne opinions zaroor bataayein.

 

Facebook Comments

Recommended For You

About the Author: Pooja Choudhary

Leave a Reply

Your email address will not be published.

%d bloggers like this: