Duniya Ki Sabse Badi Smartphone Factory ka Inauguration Kiya PM Modi Ji Ne

‘Make in India’ initiative ke chalte bahut si mobile companies ne India mein apne manufacturing plants start kiye jinmein Xiaomi se lekar Vivo, Lenovo tak sabhi ke naam shaamil hain. Isi list mein ek aur naam Samsung ka bhi hai, jiska sabse bada mobile manufacturing plant aaj Noida mein open hua hai. Ye mobile factory kewal Samsung ki hi nahin, balki world largest mobile factory hai jiska inauguration aaj India mein hua hai.

Samsung ek Korea based company hai aur kuch samay pehle tak khabar ye thi ki world largest mobile factory China mein open hogi. Lekin na Korea aur na China, sabse badi mobile factory ki opening ceremony aaj hamaare desh mein Noida, sector 81 mein poori hui hai.

Samsung ka ye world largest mobile factory 35 acres mein banaayi gayi hai, jiski opening ceremony mein PM Mr. Narendra Modi aur South Korean President Moon Jae-in bhi shaamil huye hain.

India mein is leading company ki pehli electronics manufacturing company 1990s mein shuru hui aur mobile plant ki starting 2005 mein hui aur ab is sabse bade mobile factory se company ka production double ho jayega.

Pichle saal lagbhag isi samay Samsung ne announce bhi kiya tha, ki Noida mein apne plant ko open karne aur use expand karne ke liye company ismein 4,915 crore rupees ki investment karne jaa rahi hai aur ab ek saal ke baad finally ye plant open ho chuka hai.

Saath hi Samsung ne ye bhi bataya hai ki company ab tak India mein 67 million smartphones bana rahi hai aur is plant ke open hone ke baad ye ginti 120 million tak pahunch jayegi. Iske alawa company ka kehna ye bhi hai, ki kewal mobiles hi nahin balki thode hi samay mein company ke other products jaise ki TV, fridge, etc. ki production bhi badh jayegi.

Saath hi is plant ke open hone ke baad aur Samung ke Tamilnadu ke manufacturing plant aur 5 R&D centres mein kul milakar India ke lagbhag 70,000 logon ko rozgaar mila hai.

Facebook Comments

Recommended For You

About the Author: Pooja Choudhary

Leave a Reply

Your email address will not be published.

%d bloggers like this: