Samsung Ki Nayi M-Series Ke First Smartphones Ki Details Leak; Certification Site Par List Hua Galaxy M10

Jahan audience ko Samsung ke foldable phone aur Galaxy S10 ka intejaar hai wahin Samsung doosri taraf nayi smartphone series launch karne ki taiyaari mein hai. Kuch samay se Samsung Galaxy M10 aur M20 smartphones ke leaks saamne aa rahe hain, aur inke specs ko lekar bhi market mein kaafi charcha hai. Maana jaa raha haai ki M-series, company ki J-series ko replace kar sakti hai.

In smartphones ko lekar abhi tak kuch rumors aaye hain, lekin aaj saamne aaye leaks ke according, Galaxy M20 mein kaafi badi battery aane ki ummid hai. Galaxy M20 mein aapko 5000mAh ki battery mil sakti hai. saath hi iss phone mein Samsung ka Exynos 7885 Soc processor bhi diya jaa sakta hai. Aur ismein aapko waterdrop notch bhi dekhne ko mil sakti hai. In leaked specifications ke alawa yeh smartphones ek certification website par bhi dekhe gaye hain.

Reports ki maanein to, Samsung M20 mein TFT LCD display aane ki ummid hai. Saath hi kaha jaa raha hai ki M-series Samsung ki budget smartphone series hogi, jismein ye dono smartphones jaldi hi launch ho sakte hain aur dono phones ki price Rs 10,000 se 15,000 ke beech mein rakhi jaa sakti hai.

Wahin rumors ki according Galaxy M20 phone ke optics bhi saamne aayi hain jahan 13MP ka primary rear camera aur 5MP ka secondary camera aapko dekhne ko mil sakta hai. Wahin front camera ki baat karein to is handset mein 8MP ka front facing camera fit kiya jayega. Iske alawa phone ke back panel aapko finger print sensor ka option bhi mil sakta hai.

Wi-Fi certification ki site par Galaxy M10 smartphone ko Android 8.1 Oreo support ke saath dekha gaya hai. Phone ki internal storage bhi inn leaks mein saamne aayi hain jaha M20 mein aapko 3GB RAM aur 32GB internal storage ka option mil sakta hai. Saath hi phone ke color variant bhi saamne aaye hai jaha aapko inn phones mein blue aur dark grey color dekhne ko mil sakte hain.

Expect kiya jaa raha hai ki yeh phone January 2019 ke suruaati week mein launch kiya jaa sakta hai. Jahan finally iske models aur price ko open kiya jaaega. Yeh dekhna interesting rahega ki M-series ke yeh entry level phone market mein pehle se available baaki phones ko takkar de paaenge ya nahi.

Facebook Comments

Recommended For You

About the Author: Prachi Kulshrestha

Leave a Reply

Your email address will not be published.

%d bloggers like this: