Samsung Galaxy A90 ki Complete Specifications Launch Se Pehle Leak Hui

Samsung ki Galaxy A-series is waqt sabse jyada famous ho rahi hai. India mein Galaxy A10, A30 aur A50 ko launch karne ke baad, company ne dheere dheere is series ko expand karna shuru kar diya hai. Galaxy A60, Galaxy A40, A20 jaise smartphones ki announcement ke baad, sabse jyada charcha jis smartphone ki ho rahi hai, wo hai Galaxy A90. Aaj ki taaza khabar ye hai, ki is upcoming Galaxy A-series smartphone ki complete specs humaare saaamne aa chuki hain.

Galaxy A90, jise kuch rumors mein A80 bhi kaha jaa raha hai, ki leaks Chinese social media platform Weibo ke ek user ke through saamne aayi hain. Is user ke according Galaxy A90 mein 6.7 inch ki notchless display di jaayegi aur ye full HD+ resolution ke saath aayegi. Ismein bhi Samsung ke baaki smartphones ki tarah AMOLED panel ka hi use kiya gaya hai.

Iske alawa Galaxy A90 mein triple rear cameras honge, jinmein 48 MP ka front camera f/2.0 aperture ke saath, 8 MP camera f/2.4 aperture ke saath aur third ToF camera fit kiya jayega. Ismein khaas cheez ye hai ki phone mein pop-up rotatable camera hai, yaani ki ye triple rear sensors, rotatable hain, jo selfie shooter ka bhi kaam karenge. Yahaan hum ye bhi keh sakte hain ki ye triple front cameras ke saath aane waala first smartphone hoga aur 48 MP ke saath aap amazing selfies le sakenge.

Saath hi Galaxy A90 mein SDM7150 chipset hone ki baat, is Weibo user ke kahi hai, jahaan hexa cores ki clock speed 1.7 GHz hai aur dual cores ki speed 2.2 GHz hai. Is handset mein aapko 3700mAh ki battery milegi, jo ki 25W fast charging support ke saath aayegi.

Well, yahaan par jo cheez abhi nahin pata chali hai, wo ye hai ki ye smartphone kitne aur kaunse storage variants mein launch kiya jaa sakta hai. Lekin Samsung jis Galaxy A-series smartphone launch event ko host karne waala hai, wo ab jyada door nahin hai. Expect kiya jaa raha hai ki Galaxy A90 ki storage options aur price bhi humein April 10 ko pata chal hi jayegi.

Facebook Comments

Recommended For You

About the Author: Pooja Choudhary

Leave a Reply

Your email address will not be published.

%d bloggers like this: