Samsung Galaxy A70 Ki Pricing Details Saamne Aayi, Jaldi Hi India Mein Bhi Hoga Launch

Samsung apni Galaxy A-series ko lekar kaafi charcha mein hai. Is series ki shuruaat India mein Galaxy A10, A30 aur A50 ke launch ke saath hui thi. Iske baad company ne alag alag deshon mein Galaxy A60, A40, A20e aur A80 jaise smartphones announce kiye, lekin abhi ye handsets India mein nahin aaye hain.. Lekin ab lag raha hai ki A-series ka next phone India mein jaldi hi launch hone waala hai, jo ki Galaxy A70 hai.

Galaxy A70 ko company ne last month introduce kiya tha, lekin iski pricing details aaj China mein announce ki gayi hain. Iske alawa Samsung India ki website par bhi ye smartphone haal hi mein list kiya gaya hai, jisse expect kiya jaa raha hai ki, bahut jaldi company is smartphone ko India mein launch kar sakti hai.

Samsung India par Galaxy A70 ko complete specifications ke saath show kiya gaya hai, lekin iski India price abhi wahaan mention nahin ki gayi hai. Maana jaa raha hai ki company is smartphone ko jaldi hi India mein launch karegi aur tabhi iski price bhi announce ki jayegi.

Is smartphone ke specs ki baat karein to, iske key features hain ismein diye gaye in-display fingerprint scanner, Snapdragon 675 processor aur triple rear cameras.

Galaxy A70 ko 6GB RAM aur 128GB internal memory version ke saath list kiya gaya hai aur China mein is variant ki price hai 2,999 yuan (approx. 31,000 INR). Halaanki is handset mein 8GB RAM model bhi hai, lekin Samsung India website par ise nahin dekha gaya hai, yaani ki India mein iska kewal 6GB+128GB variant hi available hoga aur maana jaa raha hai ki iska price 30,000 INR se upar hi rahega.

Other specs par nazar daalein to, Galaxy A70 mein 6.7 inch ki FHD+ Super AMOLED Infinity-U display di gayi hai. Iske alawa ismein Octa Core Snapdragon 675 chipset moujood hai. Is smartphone mein aapko 4500mAh ki juicy battery 25W fast charging support ke saath milti hai.

Iske alawa Galaxy A70 mein 32 MP ka main camera f/1.7 aperture aur LED flash light ke saath, 8 MP ka wide angle camera f/2.2 aperture ke saath aur 5 MP ka depth focus camera f/2.2 aperture ke saath diya gaya hai. Saath hi selfie shooter bhi aapko yahaan par front par 32 MP resolution ke saath hi milta hai.

Facebook Comments

Recommended For You

About the Author: Pooja Choudhary

Leave a Reply

Your email address will not be published.

%d bloggers like this: