Redmi Note 7 Pro Vs Galaxy A50 Detailed Comparison: Who Is The Best?

Xiaomi ne India mein haal hi mein apna budget flagship phone Redmi Note 7 Pro launch kiya hai. Ise hum yahaan budget flagship isliye keh rahe hain kyunki 13-15K ki range mein ye abhi tak best smartphone hai  jo aapko Snapdragon 675, premium design aur 48MP rear camera jaise features ke saath milta hai.

Agar Note 7 Pro ki takkar mein kisi smartphone ki baat karein to wo hai, haal hi mein launch hua Samsung ka Galaxy A50. Is smartphone ka cost Redmi Note 7 Pro se thoda jyada hai, lekin specs bhi achhe hain. Ismein AMOLED display, triple rear cameras aur in-display fingerprint sensor jaise features diye gaye hain.

To agar aap apna thoda sa budget extend kar sakte hain aur in dono smartphones ke beech mein confused hain, to neeche diye gaye is detailed comparison se aapki confusion door ho sakti hain.

Design And Build Quality

Redmi Note 7 Pro aur Galaxy A50, dono hi yahaan par aapko gradient color options ke saath milte hain. Redmi Note 7 Pro mein front aur rear dono taraf Corning Gorilla Glass 5 protection di gayi hai. Company ne yahaan par glass body ka use kiya hai aur beech mein plastic frame hai, jo ek premium phone ka feel deta hai.

Jabki Galaxy A50 mein polycarbonate body di gayi hai, yaani ki plastic ka use kiya hai, lekin iski quality kaafi achhi hai aur ye aapko gradient finish ke saath milta hai. Saath hi A50 ke edges round hain, to hath mein pakadne mein ye phone Redmi Note 7 Pro ke comparison mein jyada comfortable hai. Wahin aage ki taraf AMOLED display hai, jiske colors aur look, dono hi Redmi Note 7 Pro se better hain.

Yahaan par hum ye kahenge ki dono hi smartphones ke looks kaafi achhe hain, lekin agar aapko glass aur flat body chahiye to aap Note 7 Pro choose karein, otherwise classy look, rounded edges aur easily hand operation ke liye aap Galaxy A50 ko bhi chun sakte hain.

Display

Redmi Note 7 Pro aur A50 dono mein hi aapko full HD+ display milta hai, saath hi dono waterdrop notch ke saath launch kiye gaye hain. Lekin yahaan par Redmi Note 7 Pro mein LTPS in-cell display hai, jabki Galaxy A50 mein Super AMOLED panel ka istemaal kiya gaya hai.

Display yun to dono hi smartphones ke kaafi achhe hain, lekin Galaxy A50 mein AMOLED panel ke saath detailing, brightness aur color contrast aapko kaafi achhe milte hain. Iske alawa A50 mein display ki feel aur quality bhi Note 7 Pro se better hai.

Processor

Galaxy A50 mein Octa Core Exynos 9610 processor hai, jismein four cores ki clock speed 1.7 GHz hai, aur other four cores ki clock speed yahaan par 1.7 GHz di gayi hai. Iske alawa Mali G72 GPU hai. Wahin Redmi Note 7 Pro mein Snapdragon 675 processor milta hai, jiski clock speed 2.0 GHz hai aur yahaan aapko Adreno 612 GPU milta hai.

Note 7 Pro ki performance yahaan par jyada behtar hai. Galaxy A50 ke Exynos 9610 mein bhi koi lag nahin hai, lekin Snapdragon 675 ke mukaable iski performance thodi peeche hai. Aap ye keh sakte hain ki Galaxy A50 ke Exynos 9610 ki performance Snapdragon 660 se behtar hai aur SD 675 se thodi kam hai.

Dono hi smartphones mein aap heavy games chala sakte hain, lekin Redmi Note 7 Pro mein aapko achhi gaming performance dekhne ko milti hai. Wahin lag aapko kisi bhi smartphone mein nahin milega.

Redmi Note 7 pro ka AnTuTu score 180526 hai, jabki A50 ka 144013 points hai.

Software

Yahaan par Samsung ka Galaxy A50 jyada better hai, kyunki ismein Android 9.0 Pie OS ke saath aapko One UI milta hai, jo ki latest software hai. Samsung ne isse pehle One UI sirf apne flagship smartphones mein diya hai, aur iske baad A-series mein is flagship interface ko offer kiya hai. Samsung ne ise kaafi achhe se re-design kiya hai aur kaafi premium aur simple interface hai. Chote chote animations aur designs bhi kaafe achhe hain, wahin MIUI 10 ki tarah ismein aapko ads dekhne ko nahin milenge, saath hi HD streaming support bhi hai.

Jabki Redmi Note 7 Pro mein features thode jyada hai, lekin ads bhi kaafi dekhne ko milte hain. Saath hi One UI isse elegant hai. Iske alawa ismein HD streaming certification hai, lekin abhi ye phone ise support nahin karta hai, ummid hai ki aane waale updates mein company HD streaming de.

Camera

Redmi Note 7 Pro ki highlight hi, uska rear camera hai, jo ki 48 MP ke saath aata hai, wahin detailing, color saturation bhi ismein jyada hai. Yahi is smartphone ka ek plus point hai. Lekin Galaxy A50 mein triple rear cameras hain, jismein main, depth focusing ke alawa ek wide angle camera bhi hai, jo aapko Note 7 Pro mein nahin milta. Lekin Redmi Note 7 Pro ki pictures mein aapko exposure jyada milta hai.

Galaxy A50 mein 25+8+5 MP camera setup hai, jabki Redmi Note 7 Pro mein 48+5 MP hain. Dekhne mein Galaxy A50 ke colors aapko achhe lag sakte hain, lekin natural colors ke saath images aapko Redmi Note 7 Pro ke camera ke saath milta hai. Zoom karne ke baad bhi Note 7 Pro aapko kaafi achhe details deta hai.

Wahin agar selfie ki baat karein to 25 MP front camera ke saath Galaxy A50 aapko better selfies deta hai, jabki Note 7 Pro mein 13 MP ka front camera diya gaya hai.

Camera Samples

Battery

Dono hi smartphones mein aapko 4000mAh ki battery milti hai. Galaxy A50 mein bhi fast charging support hai aur Note 7 Pro mein bhi Qualcomm Quick Charge 4.0 support diya gaya hai. Lekin Note 7 Pro mein Quick Charge 4.0 ke liye aapko 18W ka charger alag se purchase karna hoga.

Price, Storage And Availability

Note 7 Pro ka 4GB+64GB variant kal se available hoga, jiski kimat 13,999 INR hai, jabki Galaxy A50 ke isi version ka price 19,990 INR hai. Redmi Note 7 Pro mein 6GB+128GB version ko aap 16,999 INR mein purchase kar sakte hain, wahin A50 ka 6GB+64GB variant 22,990 INR mein available hai.

 

Verdict

Redmi Note 7 Pro mein aapko better rear camera aur powerful chipset milta hai, jabki ismein rear mounted fingerprint scanner hai. Wahin Galaxy A50 mein Super AMOLED display hai, jo ki jyada achhi hai. Saath hi ismein in-display fingerprint scanner, better selfie camera diya gaya hai.

Ab decide aap kijiye ki aapko glass finish, powerful chipset ke saath Redmi Note 7 Pro chahiye ya phir better display, front camera aur premium One UI interface ke saath aap A50 purchase karna chahte hain. Lekin A50 kuch maamlon mein agar aage hai, to uska price bhi Redmi Note 7 Pro ke mukaable 6,000 INR jyada hai. Yaani Note 7 Pro mein jo kamiyaan hai, use ye price difference bhar deta hai.

Facebook Comments

Recommended For You

About the Author: Pooja Choudhary

Leave a Reply

Your email address will not be published.

%d bloggers like this: