Redmi Note 7 Pro First Impression & Quick Review: Amazing Design & Powerful Chipset

Xiaomi ne aaj India mein aggressive price par Redmi Note 7 ke saath Redmi Note 7 Pro ko launch karke sabko hairaan kar diya hai. Glassy back, Snapdragon 675 chipset, waterdrop notch jaise features ke saath aaj India mein launch hua ye handset 15K price range mein kaafi achha option ban sakta hai.

Well, specs to aap jaan hi chuke hain, lekin actually phone ka design kaisa hai aur performance ye kitni achhi de paata hai, aaiye is quick review mein hum zara jaan lete hain.

Design And Build Quality

Redmi Note 7 Pro ka design kaafi achha hai, yahaan par aapko front aur rear panel dono taraf Corning Gorilla Glass 5 milta hai, jabki beech mein jo frame hai, wo plastic ka hai. Xiaomi ke ye pehle phones hain, jo India mein waterdrop notch ke saath launch kiye gaye hain (Xiaomi ise Dot Drop notch kehta hai). Yahaan par agar aapko sober color chahiye to aap Black choose kar sakte hain, otherwise gradient color options mein Neptune Blue and Nebula Red bhi available honge.

Saath hi ek kaafi bada aur positive change ye hai ki ismein USB Type-C port diya gaya hai, ye Redmi series ka India mein first handset hai, jismein aapko Type-C port mil raha hai. Iske alawa 19.5:9 ki display hai, right edge par volume rocker aur power button hai, left edge par SIM tray slot hai.

Redmi Note 7 Pro splash proof bhi hai aur company ke according ye handset minor drops mein easily survive kar sakta hai.

Ab agar hum over all looks ki baat karein to ye handset aapko premium aur expensive phones ka feel deta hai. Lekin ye handset thoda sa thick hai aur rear glass par easily smudges bhi lagte hain. Otherwise, hum yahi kahenge, ki design is baar kaafi achha hai, Redmi Note series mein.

Display

Redmi Note 7 Pro mein 6.3 inch ki full HD+ 19.5:9 display hai. Yahaan par Redmi ne waterdrop notch ke sath LTPS in-cell display use ki hai. Jitna hum abhi tak dekh paaye hain, display kaafi achhi hai. Lekin color accuracy aur sunlight visibility ke baare mein hum aapko thode waqt mein, is handset ko use karne ke baad hi bata sakenge.

Hum keh sakte hain ki ismein display ke chaaron taraf bezels slim hain, lekin properly bezel-less display word hum yahaan use nahin karenge. Halaanki is price mein ye display achha hai.

Hardware and Software

Redmi Note 7 Pro mein Octa Core Qualcomm Snapdragon 675 chipset hai, jo 2.0 GHz ki clock speed ke saath aata hai. Performance ki baat karein to, obviously Redmi Note 7 ke comparison mein aapko kaafi achhi performance dekhne ko milegi. Saath hi hum is chipset ko isse pehle Vivo V15 Pro mein bhi use kar chuke hain aur waakyi mein iski performance kaafi achhi hai.

Iske alawa Xiaomi bhi ye claim karti hai ki Snapdragon 675 ka performance, Snapdragon 660 aur Snapdragon 710, dono se hi behtar hai. Hopefully, aapko yahaan par kisi bhi tarah ka koi lag dekhne ko nahin milega aur company ke according game lovers ke liye bhi ye handset kaafi achha hai.

Overall hum yahi kahenge ki is handset ki highlight iski performance hi hai aur gaming ke liye bhi ye is price range mein Snapdragon 675 ke saath best handset hai.

Is smartphone mein Android 9.0 Pie OS ke saath MIUI 10 diya gaya hai. Ismein bhi familiar MIUI 10 hai, jo aapko Xiaomi ke kayi phones mein dekhne ko mil chuka hai. 

Camera

Redmi Note 7 Pro mein 48 MP ka rear camera hai aur 5 MP ka secondary depth focusing shooter hai. Camera mein yahaan Sony IMX586 lens ka use kiya gaya hai, jo f/1.79 aperture ke saath aayega. Xiaomi ne yahaan par binning technology ka istemaal kiya gaya hai, jo ki four pixels ko combine karke one pixel ki tarah treat karta hai aur 12 MP ki image create karta hai, jisse aapko amazing detailing aur dynamic range milti hai. Iske alawa ismein Pro mode bhi hai, jise choose karke aap 48 MP ki images le sakte hain, lekin company ne according, koi camera professional hi is mode ka jyada behtar istemaal kar sakta hai. Jabki normal users ke liye auto mode hi achha hai.

Saath hi company ne ismein AI scene detection, night mode bhi diya hai aur OTA update ke through studio lighting mode bhi jaldi hi available hoga.

Ismein selfie pictures lene ke liye aapko 13 MP ka camera milta hai, jiski performance ke baare mein hum 1-2 din baad hi bata paayenge.

Battery

Redmi Note 7 Pro mein 4000mAh ki battery di gayi hai. Box mein aapko 10W ka charger milta hai aur USB Type-C port bhi is baar Redmi Note series mein moujood hai. Saath hi battery yahaan par Qualcomm ke Quick Charge 4.0 fast charging support ke saath di gayi hai, lekin iske liye aapko 18W ka charger alag se purchase karna hoga.

Verdict

Xiaomi is baar, Redmi Note 7 Pro ke saath India mein is price range mein sabko achhi takkar dene ke liye aayi hai. Ye pehla Xiaomi ka phone hai, jismein aapko waterdrop notch, Snapdragon 675 ki performance aur 48 MP ka camera mil raha hai. Saath hi company ne design bhi kaafi attractive diya hai. So is price range mein aap is handset ko best keh sakte hain. Lekin ek choti si kami ye hai ki Quick Charge 4.0 support to hai, lekin uske liye aapko alag se charger purchase karna hoga.

Redmi Note 7 Pro ki kimatein 13,999 INR se start hoti hain aur aap ise Flipkart, Mi.com aur Mi Home stores par 13th March se purchase kar Sakte hain.

Facebook Comments

Recommended For You

About the Author: Pooja Choudhary

Leave a Reply

Your email address will not be published.

%d bloggers like this: