Redmi 6 India me, MediaTek Helio P22 Ke Saath September Mein Hoga Launch (Exclusive)

Is saal India mein Xiaomi ke phones lagbhag every month launch ho rahe hain aur inki shuruaat February mein launch huye Redmi Note 5 aur Note 5 Pro se hui. Is saal launch huye smartphones ki list mein Redmi Note 5, Redmi 5, Note 5 Pro aur iske baad dheere dheere Redmi Y2, Mi A2 aur kal hi Poco F1 launch kiya gaya hai.

Aaj ki taaza khabar ye aayi hai ki is list mein Xiaomi aur bhi naye smartphones launch karne jaa raha hai. Sharmaji Technical aapko sabse pehle ye bata rahe hain ki Redmi 6 aur Redmi 6 pro next month yaani ki September ke first half mein India mein launch kiye jayenge.

Redmi 6 aur Redmi 6 Pro ka global launch June 2018 mein ho chuka hai aur ab Xiaomi inhein India mein launch karne ki taiyaari kar raha hai. Saath hi badi khabar ye bhi hai ki Redmi 6 ko India mein MediaTekk Helio P22 chipset ke saath launch kiya jayega.

Darasal, 2014 mein, Ericcson aur Xiaomi ke beech ek patent dispute ki wajah se High court ne Xiaomi par MediaTek processor ke saath India mein smartphones sale karne par ban laga diya tha. Waise to company ne Redmi 6 ko India se bahaar MediaTek Helio P22 ke saath hi launch kiya hai, lekin India mein is company ne sabhi smartphones Snapdragon chipset ke saath hi launch hote hai. Lekin ab ye dispute kaafi samay pehle solve ho chuka hai aur ab September mein Redmi 6, India mein MediaTek Helio P22 SoC ke saath entry karega.

MediaTek P22 ko AnTuTu benchmarking par 78211 ka score mila hai, jabki Snapdragon 450 ka ye score 66618 hai aur Snapdragon 625 chipset ka AnTuTu score 76134 hai. Is score se saaf pata chalta hai ki MediaTek P22 chipset ke saath aane waala Redmi 6, aapko achhi performance dene waala hai. MediaTek P22 ka overall performance bhi Snapdragon 450 aur 625 ke thoda behtar hai, jise detail se jaanne ke liye aap neeche di gayi video bhi dekh sakte hain.

Iske alawa is smartphone mein jo features hain, unmein 5.45-inch ki HD+ display, 3GB / 4GB RAM, 32GB / 64GB storage aur 3400mAh ki battery shaamil hai. Iske alawa ismein 12 MP ka primary rear camera LED flash light, PDAF, f/2.2 aperture ke saath diya gaya hai aur saath hi 5 MP ka secondary rear camera bhi moujood hai.

Saath hi ismein hybrid dual SIM slot, Android 8.1 Oreo OS aur fingerprint scanner jaise features bhi moujood hain.

Ab agar aap iske price ke baare mein soch rahe hain, to hum aapko bata dein ki iski kimat 8,000 se 11,000 INR ke beech hogi.

Iske alawa ummid ye bhi hai ki Redmi 6 Pro ko bhi, iske saath hi launch kiya jaayega, jismein Snapdragon 625 chipset aane ki ummid hai.

Ye smartphone bhi June mein globally announce kiya jaa chuka hai. Redmi 6 Pro mein aapko 5.84-inch ki full HD+ display milegi, snapdragon 625 chipset ke saath, ismein Adreno 506 GPU aayega. Ye handset nano dual SIM support aur dedicated microSD card slot ke saath aayega jo 256GB tak ke card accept karta hai.

Redmi 6 Pro mein 12 MP ka primary camera, f/2.2 aperture, LED flash light, Sony IMX486 sensor, PDAF aur secondary 5 MP camera ke saath aayega. Ismein bhi Redmi 6 ki hi tarah 5 MP ka frontal shooter hoga, lekin battery capacity 4000mAh ki hai

Redmi 6 Pro ke bhi two storage variants aane ki ummid hai, jinke price lagbhag 11,000 INR aur 13,000 INR ke aas-paas honge.

Facebook Comments

Recommended For You

About the Author: Pooja Choudhary

Leave a Reply

Your email address will not be published.

%d bloggers like this: