Realme 1 Vs Redmi Note 5 Pro: Kaun Hai Best Performer ?

15 May ko launch huye Realme 1 ki charcha is samay sabhi jagah hai, dekha jaaye to Oppo ki sub-brand dwara launch kiya gaya ye ek aisa smartphone hai jo affordable range mein aapko kaafi powerful specs de raha hai. Is smartphone ki price range 9,000 se 14,000 INR hai aur iski khaas baat ye hai ki ye India mein behad pasand kiye jaane waale brand Xiaomi ke Redmi Note 5 Pro ko seedhi takkar de raha hai.

Well, Realme 1 ke baare mein hum apne FAQ mein lagbhag sab kuch bata chuke hain lekin ye janna ab bhi baaki hai ki ye smartphone Redmi Note 5 Pro se kitna behtar ya peeche hai. To aaiye jaante hain is question ka detailed answer is comparison mein.

Design

Design ki baat karein to Realme 1 ka design premium category ka hai. Full view display ke saath Diamond Black color mein, diamond cuts pattern mein iska glassy rear panel behad khoobsoorat dikhta hai jo different angles se dekhne par reflect bhi hota hai.

Redmi Note 5 Pro jo ki is saal ka Xiaomi ka India mein pehla aur most awaited smartphone reh chuka hai, kayi cheezon mein behtar hai, lekin design wo cheez nahin hai. Redmi Note 5 Pro mein simple metal plastic rear panel hi use kiya gaya hai, jo dekhne mein sober hai lekin Realme 1 jitna attractive nahin.

Display

Realme 1 aur Redmi Note 5 Pro mein display par aapko lagbhag similar response hi milta hai. Realme 1 mein 6 inch display hai aur Note 5 Pro mein 5.99 inch. Dono hi smartphones full HD+ resolution aur 18:9 aspect ratio ke saath aapko milte hain. Halaanki Redmi Note 5 Pro mein display par Corning Gorilla Glass bhi moujood hai, jo ki Realme 1 mein nahin diya gaya hai.

Camera

Redmi Note 5 Pro mein dual rear camera setup diya gaya hai, jabki Realme 1 mein 13 MP ka single camera hai. Halaanki yahaan dono hi smartphones mein aapko LED flash light, PDAF jaise common features milte hain aur saath hi dono smartphones mein bokeh effect bhi diya gaya hai.

Realme 1 ho ya Redmi Note 5 Pro, dono ka front camera 8 MP ka hai aur tasveeron ki detailing bhi dono mein abover average kahi jaa sakti hain. Halaanki Redmi Note 5 Pro ka bokeh effect Realme 1 se slightly better feel deta hai aur detailing and colors dono se click ki gayi pictures mein achhe hain.

Hardware and Storage

Realme 1, Oppo ka online brand hai jiske pehle hi smartphone mein company ne 9,000 ki price range mein MediaTek Helio P60 jaisa mid-range aur powerful processor diya hai. Jabki Xiaomi ke Redmi Note 5 Pro mein aapko Snapdragon 636 chipset milta hai.

Jaisa ki humne FAQ mein bhi aapko bataaya tha, Helio P60, Snapdragon 636 CPU se thoda jyada fast aur powerful lagta hai, to Realme 1 yahaan par apne competitor se thoda aage hai aur iska gaming performance bhi behtar hai.

Realme 1 mein three storage variants hain – 3GB RAM with 32GB ROM, 4GB RAM with 64GB internal memory aur 6GB RAM with 128GB storage. Redmi Note 5 Pro mein aapko two storage options hi milte hain – 3GB aur 4GB RAM ke saath 32GB / 64GB flash storage.

Battery

Working persons aur travelers ke liye battery capacity smartphone ka sabse important hai au rise dekhte huye aapko Redmi Note 5 Pro hi lena chahiye jismein 4000mAh ki battery hai jabki iska competitor kewal 3410mAh ki battery offer kar raha hai jismein fast charging support bhi nahin hai.

Pricing and Availability Details

Redmi Note 5 Pro jo ki February mein launch hua tha, ki kimat 10,000 se 15,000 INR ke beech hai aur Realme 1 ki kimat 9,000 se 14,000 INR ke beech. Halaanki Realme 1 ka 6GB RAM aur 128GB ROM version aapko 13,990 INR par milta hai aur Redmi Note 5 Pro ka 4GB RAM aur 64GB ROM variant 14,999 INR hai.

Iske alawa Redmi Note 5 Pro ek Flipkart exclusive smartphone hai aur saath hi Mi.com par bhi available hai. Jabki Realme 1  kewal Amazon.in par hi uplabdh hai.

Facebook Comments

Recommended For You

About the Author: Pooja Choudhary

Leave a Reply

Your email address will not be published.

%d bloggers like this: