Purana Hua 2018 Ka Notch Aur Dual Rear Cameras Trend; 2019 Mein Kya Hoga Naya Smartphone Trend?

2018 ke last month mein hain hum aur technology ke world mein sabhi ko aane waale naye saal ke saath, nayi technologies ka bhi intezaar hai. Well, yahaan par agar hum 2018 mein gaur se dekhein to notch hi ek aisi cheez hai, jo sabse jyada trend mein rahi hai. iPhone X se start huye is notch display ke trend ko lagbhag sabhi choti badi companies ke apnaaya hai. Lekin ab shuru hone wala hai, 2019.

2018 mein Phone design ko lekar companies ke kaafi achhe aur bure changes kiye hain. Wahin premium smartphone se lekar entry-level smartphones mein aapko wide notch aur dew-drop notch dekhne ko mili hai.

Lekin yahaan par dhyaan dene waali baat ye hain ki notch design yun hi nahin aaya hai, balki iska motive raha, bezels ko slim karke, same space mein, more screen offer karna.

Lekin ab sawaal ye hai, ki aane waale saal yaani ki 2019 mein smartphone makers, kya naya lekar aane waale hain. Yay un kahein ki 2019 mein smartphone mein kaun sa trendy feature dekhne ko mil sakta hai ?

Lekin ab leading companies notch design se aage badhne ki soch rahe hain, saath hi aise phones launch karne ki koshish hai, jismein aapko purely sirf display nazar aayein, aur extremely slim bezels hon, jiska nateeja hai hole-punch selfie camera phones. Haal hi mein launch huye, Huawei ka Nova 4 aur Samsung ke Galaxy A8s mein aapne ye technology dekhi hi hogi. Isi trend ko kuch companies aage 2019 mein bhi follow karti nazar aayengi.

Iske alawa Vivo NEX jo kuch hi dinon pehle launch hua hai, usmein aapko pure full view display di gayi hai, jismein na koi notch hai aur naa hi hole-punch camera. Yahaan par selfie ke liye aapko rear panel par bhi screen milti hai jisse rear cameras hi aapke liye selfie camera ka kaam bhi karte hain. Yaani ki dual displays ki technology, jo aapne Vivo NEX aur Nubia X mein dekhi, wo bhi 2019 ka ek naya trend ban sakti hai.

Saath hi 2019 mein aapko all new display technology dekhne ko milne waali hai. Ji haan, hum baat kar rahe hain, foldable smartphones ki, jo aapke liye tablet aur smartphone, dono ka hi kaam karne waale hai. Flexpai, world ka first foldable smartphone hai, jo last month launch ho chuka hai. Lekin aane waale Samsung Galaxy F se logon ko kaafi ummidein hain aur maana jaa raha hai ki iske baad Huawei aur LG bhi apne foldable handsets launch karenge.

Iske alawa 2019 mein more screen offer karne ke chakkar mein kaafi companies apne mid-range handsets mein slider mechanism ko bhi apna sakti hain aur iske alawa lagbhag sabhi flagship aur mid-range smartphones mein aapko 5G support bhi milne waala hai.

Iske alawa ek aur trend jo aapko 2019 mein kaafi dekhne ko milne wala hai, wo hai, triple aur quad rear cameras ka trend. Halaanki iski starting 2018 ke last months mein ho chuki hai, lekin aane waale year mein ise kaafi companies apne handsets mein provide karne waali hain.

Abhi tak aapne jo triple rear cameras ke saath smartphones dekhein hain, unmein Huawei ki P20 series, Lenovo Z5s, Oppo R17 Pro aur Samsung Galaxy A7 (2018) jaise smartphones shaamil hain. Wahin Samsung Galaxy A9 (2018) four cameras ke saath aane wala world ka first smartphone hai.

In sabhi technologies ke saath company apne handsets ko kya naya look deti hai, ye to 2019 mein dekhna kaafi interesting rahega. Lekin inmein se aapko sabse achha feature kaun saa lagta hai, ye humein zaroor bataaiye.

Facebook Comments

Recommended For You

About the Author: Pooja Choudhary

Leave a Reply

Your email address will not be published.

%d bloggers like this: