Pulwama Mein Huye Attack Mein Saheed Huye Desh Ke 40 Jawaan, Pakistan Se Wapas Liya Gaya ‘Most Favoured Nation’ Status

14th February 2019, Is din ko black day naam de dena chaiye, aisa aaj humara poora desh kah raha hai. Lekin aakhir aisa hua kya? 14 February ko ek terrorist attack kiya gaya tha jismein humare desh ke 40 army officers ko maar diya gaya hai. Yeh attack Kashmir ke Pulwama town ke awantipora gaon ke goripura area mein hua hai. Yeh area Kashmir highway ka hai, jo Kashmir Ghati ko desh se connect karta hai. Iss attack mein maare jaane wale soldiers CRPF regiments se the. CRPF ke iss kaafile mein 3 alag alag batalion chal rahi thi, jinmein Batalion 35, Batalion 54 aur Batalion 179 included thi. 2,500 soldiers ka yeh kaafila 70 alag alag vehicles (Army Buses) mein jaa raha tha. Jahan ek vehicles ek car se takaraya aur blast ho gaya.

 

Abhi tak saamne aayi news mein bataya jaa raha hai ki jis car se army bus takarayi thi usmein IED (Improvised Explosive Device) tha. Yeh ek tarah ke blast hone wala material hota hai. Jise intentionally uss car mein rakha gaya tha. Uss IED rakhi huyi car ko chalane wale driver ka naam Aadil Mohhamad bataya gaya hai. Iske alawa yeh news bhi saaamne aayi hai ki wah ek suicide bomber tha. Iss attack ki responsibility jaish e mohammed terrorist group ne li hai. Yeh group 2002 se kashmir mein active hai. Iss se pehle bhi iss group ne 2017 mein ek attack kiya tha jismein Kashmir Police ka ek head constable maara gaya tha.Yahan aap uss driver ki photo dekh sakte hain.

Iss CRPF batalion ki duty Kashmir mein ho rahi snowfall ko haatane ke liye lagi huyi thi. Jahan 13th February ko apna kaam kahatm karne ke baad kal 14th February ko yeh batalion wapas aa rahi thi. Intelligence sources ke according yeh information di gayi thi ki iss tarah ke attack hone ke chances hain. Jis wajah se inhe warn bhi kiya gaya tha ki CRPF ki batalion ko alag alag groups mein le jaaya jaaye. Yeh attack URI mein kiye gaye attack se kaafi bada hai. Jahan 40 soldiers maare gaye hain. Iske alawa kuch soldiers abhi bhi injured hain aur hospital mein admit hai. Attack ke alawa saath mein chalne wale army vehicles par firing bhi ki gayi thi.

 

Yeh news aate hi humare desh ke PM Narendra Modi ne kaha ki iss attack ka aur humare desh ke soldiers ki mout ka badla liya jaaega. Lekin dukh ki baat yeh hai ki humare desh ki government iss sensitive topic par bhi politics khel rahi hai. Jahan ek party dusri party ko blame kiye jaa rahi hai. Iss attack mein saheed hone wale soldiers ki list aaj jaari ki gayi hai jismein 12 soldiers Uttar Pradesh se, 2 Rajsthan se, 2 Madhaypradesh aur baaki soldiers desh ke alag alag kone se the. Saheed huye soldiers ke alawa laapta soldiers ki list bhi jaari ki gayi hai. Pulwama mein saheed huye sabhi jawaano ke shav (Dead Bodies) ko aaj Badgaon ke CRPF mein laaya gaya hai. Jahan Home Minister Rajnath Singh ne bhi inn jawanon ko kandha diya.

 

 

Iss attack ke chalte aaj Finance Minister Arun Jaitely ne announce kiya ki ab Pakistan ke saath MFN status ko khatam kar diya jaaega. Agar aap MFN status ke baare mein nahi jaante hain to hum aapko bata dein ki detail mein ise Most Favoured Nation Status kaha jaata hai. Yeh ek economical term hain jiska use uss sense mein kiya jaata hai jab aap kisi bhi other country se economical terms bana kar rakhte hain ya unke saath business karte hain. WTO ke rules ki according MFN nations ek dusre ke  khilaaf partiality ka nature nahi rakh sakte hai. WTO rule ke according koi bhi nation tabhi yeh status baapas le sakta hai jab uske nation ko le kar safety aur security par issue uthaya jaaye. India ne Pakistan ko yeh MFN status 1998 mein diya tha jise aaj ki announcement ke baad baapas le liya gaya hai.

Iss attack ke baad saheed huye jawaano ke parents  aur families ne bhi government par kayi questions uthaaye hain. Wahin kuch logon ne iss attack ke badle dusri surgical strike ki maang ki hai. PM Narendra Modi ne iss par kaha hai ki iss ghatna ka Pakistan ko muh tod jawab jaldi hi diya jaaega. Iske alawa sabhi political parties, bollywood star aur desh ki aam janta bhi apne tarah se desh ko jawaano ko tribute de rahe hain.

Facebook Comments

Recommended For You

About the Author: Prachi Kulshrestha

Leave a Reply

Your email address will not be published.

%d bloggers like this: