Samsung Aur Huawei Ke Baad, Foldable Smartphone Launch Karne Ke Race Mein, Oppo Aur Xiaomi Milkar Karenge Kaam

Smartphones ki duniya mein lagbhag har saal ek naya trend dekhne ko milta hai. Pehle dual rear cameras, phir 18:9 display, 19:9 display aur uske baad in-display fingerprint sensors, ye sabhi features lagbhag sabhi companies apne smartphones mein dene ki koshish kar rahi hain. Lekin saath hi aane waale saal mein ek nayi technology dekhne ko milegi, jiski charcha kaafi samay se shuru ho chuki hai – Foldable Smartphones.

Rumors ye the, ki Samsung agle MWC mein foldable smartphone launch kar sakta hai, jabki shayad aisa hai nahin. Filhaal khabar ye hai ki Huawei, Samsung se pehle yaani ki early 2019 mein hi foldable smartphone launch karega.

Lekin ab jo khabar aayi hai, wo ye hai ki haal hi mein slider mechanism ke saath phone launch karne waali company, Oppo ne foldable smartphone launch karne ke liye Xiaomi ke saath tie-up kiya hai.

Sources ke according, Xiaomi aur Oppo is samay display manufacturers ki khoj mein hain, jo unke foldable phones ke liye display provide kar sakein. Is samay aisi companies limited hi hain, jo immediate basis par foldable displays ka mass production kar sakein aur Oppo & Xiaomi ke is joined venture ko usi ki talaash hai taaki is announcement ke immediate baad hi wo aise smartphone ko launch kar sakein.

Samsung ne kuch samay pehle kaha tha, ki wahi world ka pehla foldable smartphone launch karenge, lekin Huawei ne announce kiya ki Samsung se pehle wo aisa handset market mein layenge. Aur ab Xiaomi bhi is race mein shaamil ho chuka hai, lekin wo pehle China ki market ko hi target karega.

Saath hi ye bhi expected hai ki, Xiaomi, jo ki competitive price mein smartphones launch karne ke liye jaana jaata hai, agar is technology ko pehle market mein le aata hai, to consumers ko ye bhi affordable price mein mil sakegi aur Samsung aur Huawei ke foldable smartphones ki achhi competitor bhi hogi.

Facebook Comments

Recommended For You

About the Author: Pooja Choudhary

Leave a Reply

Your email address will not be published.

%d bloggers like this: