OnePlus 7 Pro: 6 Reasons To Buy & 4 Reasons Not To Buy

OnePlus 7 series India mein launch ho chuki hai aur is series ka premium smartphone hai, OnePlus 7 Pro. Is smartphone mein aapko wo sab kuch mil raha hai, jo ki 2019 ke trending features hain, jaise ki triple rear cameras, pop-up selfie camera, Snapdragon 855 chipset, 12GB tak RAM options, etc. Agar aapka budget allow kare, to iski price range mein ye ek perfect smartphone hai.

Lekin phir bhi kuch features, jo bahut se users ko chahiye, ismein shaamil nahin hai, jaise ki audio jack ka missing hona. Well, OnePlus 7 Pro ke baare mein hum aapko kuch cheezein bataate hain, jinhein dekhkar aap decide kar sakte hain ki aapko ye smartphone kharidna chahiye ya nahin.

5 Reasons To Buy

Design

OnePlus 7 Pro ka design behad khoobsoorat hai. Is smartphone mein front par aapko seamless, beautiful aur notchless display milti hai. Saath hi ye curved display ke saath aata hai aur yahaan par aapko QHD+ display par 3D Corning Gorilla Glass protection bhi milti hai. Saath hi rear panel par bhi aapko Corning Gorilla Glass 5 protection di gayi hai.

Saath hi ismein aapko dono taraf stereo speakers aur Dolby Atmos support bhi milta hai. Triple rear cameras ko bhi center mein vertically fit kiya gaya hai aur logo neeche ki taraf. Well, ye kehna hi padega ki is smartphone ka design kaafi immersive aur stunning hai.

Display

OnePlus 7 Pro mein stunning display aapko mil rahi hai. Saath hi is smartphone mein OnePlus apni sabse badi 6.67 inches ki display offer kar raha hai. Ye QHD+ Fluid AMOLED display hai, jo 19.5:9 aspect ratio ke saath aati hai. Mostly smartphones mein aapko 60Hz tak refresh rate milte hain, jinke comparison mein is smartphone ki 90Hz refresh rate ke saath aane waali display, kaafi accha experience de sakti hai.

Saath hi OnePlus 7 Pro ki display HDR10 support ke saath aa rahi hai aur ismein aapko Night mode 2.0, blue light filter jaise kuch options bhi milte hain. To, display is smartphone ka ek plus point hai, jiske kaaran aap ise kharid sakte hain.

Performance

7nm process based Qualcomm ka Snapdragon 855 chipset, is smartphone mein aapko mil raha hai. Tri-cluster architecture par based is chipset ki performance apne predecessor Snapdragon 845 ke mukaable 30% faster hai. Is chipset aur Adreno 640 GPU ke saath aap chahe heavy games khelein, multiple apps use karein ya aur kuch, aapko ek smooth experience milega.

Saath hi company ne Fnatic naam ki ek popular gaming organization ke saath bhi tie-up kar liya hai aur yahaan par aapko ‘Fnatic gaming Mode’ bhi milta hai, jise aapko ek alag hi gaming experience milega.

Is chipset ke saath company ne yahaan par 12GB RAM variant bhi offer kiya hai, jo ki high-end variant hai.

Battery

Is smartphone mein 4000mAh ki battery moujood hai, lekin yahaan par aapko 30W Warp Charge fast charging technology ka support bhi diya gaya hai. Iska fast charger bhi aapko box mein hi milta hai aur kewal 20 minutes mein aapka smartphone, 50% tak charge ho jaata hai aur approx. 50 minutes se pehle hi aapka smartphone full charge ho jaata hai.

UFS 3.0 Storage

Yahaan par aapko UFS 2.1 nahin, balki latest aur faster storage UFS 3.0 milne waala hai. OnePlus 7 Pro mein 128GB aur 256GB UFS 3.0 storage hai, jo ki UFS 2.1 se 79% faster hai. Saath hi company ne claim kiya hai ki, is technology ke saath aane waala, ye first smartphone bhi hai.

Camera

OnePlus 7 Pro mein 48 MP ka primary camera, 8 MP ka telephoto lens aur 16 MP ka ultra wide angle lens diya gaya hai. Triple rear cameras ke saath aane waala, ye first OnePlus phone bhi hai. Lekin yahaan par company ne Sony sensors, aur 3x optical zoom jaise features bhi include kiye hain. Is smartphone ke rear cameras se amazing aur vibrant pics click kiye jaa sakte hain.

Kaafi mid-range to premium smartphones mein ab low light photos ke liye Night mode hai, lekin OnePlus 7 Pro ka night mode kaafi behtar hai aur aap keh sakte hain ki iski low-light performance bahut hi amazing hai. Iske 3x telephoto zoom lens se photo lene par kaafi door tak ke objects cover hote hain, lekin detailing aur stability bhi bani rehti hai.

Is smartphone ki camera performance apni price range mein best hai.

3 Reasons Not To Buy

No Audio jack

OnePlus 7 Pro mein company ne last time bhi 3.5mm headphone jack nahin diya tha aur is baar bhi aapko USB Type-C port se hi earphone connect karna hoga. Well, iske liye markets mein connectors available hote hain, lekin phir bhi consumers audio jack, phone mein chahte hain, jo ki yahaan nahin hai.

No MicroSD card slot

OnePlus 7 Pro mein aapko 128GB aur 256GB tak ki storage options to milti hain, lekin yahaan par expansion slot ya microSD card slot na hone ki wajah se, aap memory expand nahin kar sakte. Halaanki Samsung ki S10 series aur phir Redmi Note 7 Pro jaise smartphones, in sabhi mein aapko microSD card slot diya jaata hai, jo kam se kam 256GB / 512GB tak ke memory cards accept karta hai.

OnePlus 7 Pro mein microSD card slot ka na hona, ek major drawback hai.

Heavy phone

Ye smartphone notchless big display ke saath launch hua hai, saath hi ismein thodi badi battery bhi hai, lekin inhin reasons ki wajah se ye thoda bada aur heavy bhi lagta hai, aur ye ek chota sa negative point hai. Ye smartphone 206 grams hai, to aapko haath mein thoda heavy zaroor lagta hai.

Price

Halaanki yahaan par aapko bilkul top-of-the-line features milte hain, lekin phir bhi OnePlus se consumers itna high price expect nahin kar rahe the. Jabki same chipset, 6GB+128GB storage, full HD+ display ke saath OnePlus 32, 999 INR se start hai. Jabki OnePlus 7 Pro ke isi variant ka price 48,999 INR hai. Lekin yahaa par aapko pop-up camera, QHD+ display, triple rear cameras, 30W fast charging support jaise features bhi milte hain, jo ki OnePlus 7 mein bhi hain. To yahaan par choice aap hi ko karna hai.

 

 

Facebook Comments

Recommended For You

About the Author: Pooja Choudhary

Leave a Reply

Your email address will not be published.

%d bloggers like this: