Netflix Par Release Ho Chuki Scared Games 2 Series Kesi Hai, Yahaan Jaane Series Ki Kahani Ke Baare Mein

Netflix ki most awaited web-series Sacred Games 2, 15th August ko finally on-air ho chuki hai. Agar aapne pehle season ko dekha hoga to definitely aapne bhi iske next part ko dekhne ka man bana rakha hoga. Iss series ka wait audience ko iske trailer release hone ke saath hi bana hua tha. Well, iss series ko Anurag Kashyap ne kaafi interesting banaya hai, jo ki aapko world aur technology ke next level par le kar jaati hai. Saath hi ancient time se bhi relate karti hai. Jab bhi bhavishya ki baat aati hai, to beete yug ki kisi kahani se jod kar use bataya jaata hai.

Sacred Games 2 ke lead role mein aapko Saif Ali Khan (Sartaj Singh), Nawazuddin Siddiqui (Ganesh Gaitonde), Pankaj Tripathi (Guru Ji), Surveen Chawla (Jojo), Kalki Koechlin (Batya), Anruta Subhash (Madam Yadav), Ranvir Shorey (Shahid Khan) dikhai dete hain. Iss series mein total 8 episodes hai, jismein iss poori kahani ko sameta gaya hai.

Iss baar Sacred Games ke iss season ko national mudde se nikal kar international scene tak le jaaya gaya hai. Jismein Kenya, Dubai, Portugal, India jaisi countries include ki gayi hai. Kahani ki shuruaat Gaitonde se hoti hai, jise Yadav Madam kidnap karwa leti hai. Kidnap karne ke baad use release karne ke liye Yadav madam use apne under kaam karne ke liye kahti hai, jise accept karne ke alawa Gaitonde ke pass aur koi option nahi hota hai. Gaitonde Mumbai mein apna kaam failana chahta hai aur poori Mumbai mein apna naam karna chahta hai. Lekin iske liye use kisi heavy support ki jarurat hoti hai, jo use Yadav madam se milta hai.

Yadav madam, Gaitonde ka har ek illegal kaam mein support karti hai, fir chahe wah liquor ki smuggling ho ya fir drugs ki. Isi beech Trivedi, Gaitonde ko Guru Ji se milwata hai. Pehle Gaitonde sirf phone par Guru ji baat karta hai, lekin use Guru Ji baatein samjh mein nahi aati hai. Lekin baad mein wah personally Guru Ji se jaa kar milta hai, jiske baad uska devotion Guru Ji ke liye bhad jaata hai.

 

Issi beech Sartaj Singh Mumbai par huye attack aur aane khatre ko samjhate huye terrorist ko pakadne ke liye nikal jaata hai, jahaan wah bhi apne pita ke bataye raste par chalte huye Guru Ji ki shisya Batya se milta hai. Guru ji apne satsang mein followers ko black tea pilate hain, jiske baad unhe kuch alag feel hona shuru ho jaata hai. Guru Ji apne pravchan mein hamesha kalyug se satyug mein jaane ki baat kahte hain. Gaitonde ko yeh baat shuruaat mein samjh mein nahi aati hai. Lekin Gaitonde Guru Ji ke dwara serve ki jaane wali tea ki black marketing karna shuru kar deta hai, jo ki actual mein ek drug hi hota hai.

Kuch samay baad, Gaitonde ko samjh mein aata hai ki kalyug se satyug ka yeh safar kuch aur nahi balki duniya ko khatam karne ka ek jariya hai. Jise jaante hi Gaitonde iss samay chakra se alag hone ki baat saamne rakhta hai. Iss season ki kahani bhi issi base par banayi gayi hai ki duniya ko aaj nahi to kal khatam hona hi hai. Jiska kaaran khud insaan hi hai. Insaan ne khud hi nuclear reactor jaisi cheejon ko banaya hai, global warming ke bhadne ka reason bhi insaan hi hai . Iske alawa har koi ek durse ko maarne mein laga hua hai. Isse behtar hai ki nuclear blast kar ke sab kuch ek baar mein hi khatam kar diya jaaye.

Shahid Khan dwara banaye gaye nuclear reactor se Guru ji aur Shahid khan duniya ko khatam karne ki koshish kar rahe hain. Jab Sartaj Singh ko yeh pata chalta hai ki yeh nuclear reactor ek pass-code ke through protected hai, to wah use dhundne mein lag jaata hai. At last, Sartaj uss nuclear reactor ko blast hone se bacha leta hai, jo ki ek random pattern draw ke through protect kiya gaya hota hai. Iske alawa yeh pattern Guru Ji ke dwara likhi gayi book Kalgranth se related hota hai.  Well, yeh season to yahan end ho jaata hai lekin jis tarah iski ending ki gayi hai uss se expect kiya jaa raha hai ki Sacred Games 3 ko laaya jaayega. Final verdict kaha jaaye to iss series mein aapko utna jyada violence aur nudity dekhne ko nahi milti hai jitni pehli series mein thi. Iske alawa series kahin na kahin humare aas-pass ki reality se bhi connect karti hai. Ek baar series ko dekhna shuru karne ke baad aap ise bina complete kiye nahi rah sakte hain.

 

 

Facebook Comments

Recommended For You

About the Author: Prachi Kulshrestha

Leave a Reply

Your email address will not be published.

%d bloggers like this: