Movie Review, Judgmental Hai Kya! Different Concept Ke Saath Kaafi Kuch Hai Iss Movie Mein

Kangana Ranaut aur Rajkumar Rao starter movie Judgmental Hai Kya theaters mein lag chuki hai. Movie ka title iski story ko kaafi had tak baayan kar deta hai. Movie ka naam pehle Mental Hai Kya rakha jaa raha tha, lekin baad mein censor board ke order par iss movie ka naam change kar ke Judgmental Hai Kya rakha gaya. Aapko ek baat bata dein ki agar aap iss movie ko ek regular bollywood movie ki tarah dekhne jaa rahe hain, jismein action, drama, romance hoga, to aapko apna mind thoda change kar lena chaiye. Iss movie ko director ne ek different perspective ke saath banaya hai jise samjhne ke liye aapko poora concentrate movie par banaye rakhna padega.

Movie ke lead role mein aapko Kangana Ranaut aur Rajkumar Rao ke alawa Jimmy Shergill, Satish Kaushik, Hussain Dalal ke saath aur bhi kuch actors dikhai dete hain. Iss movie ko Prakash Kovelamudi ne direct kiya hai.

 

Poori movie mental patient Bobby yaani Kangana Ranaut ke aas-pass ghoomati hai, jise Acute Psychosis naam ki bimaari hai, jiski wajah se uske parents ki maut hai. Iss bimaari ke chalte Bobby ko unn sabhi cheejon ke hone ki feeling aati hai jo huyi hi nahi hai ya fir sirf uske dimaag mein chal rahi hai. Iske chalte Bobby ko mood swings, hallucination ki problem hoti rehti hai. Bobby ek voice dubbing artist ka kaam karti hai, jismein wah kabhi south movie ke character dub karti hai to kabhi horror movie ke character ko dub karti hai, aur baad mein unn se attach ho kar wahi kaam karne lagti hai. South movie ke character mein jaa kar Bobby fight karti hai, jiske chalte use jail jaane ki saja ya mental asylum jaane ki saalah di jaati hai, jahaan Bobby mental asylum jaana choose karti hai.

Asylum se nikalne ke baad story thodi aur aage bhadti hai, jiske baad Rajkumar Rao (Keshav) apni wife ke saath Kangana ke ghar mein paying guest ki tarah rehne aate hain. Jiske baad movie mein twist aana shuru hote hain. Bobby, Keshav ki taraf attract hoti hai, lekin same time wah us par doubt bhi karti hai. Issi beech ek murder ho jaata hai, jiska blame Keshav aur Bobby par lagaya jaata hai. Dono iss murder ka blame ek dusre ke sir lagate hain. Lekin finally yeh murder kisne kiya hai, iske liye aapko yeh movie theaters mein jaa kar dekhni padegi.

Yeh movie mix masala hai, jismein aapko thrill, drama, thoda horror, kam romance sab kuch dekhne ko milta hai, saath hi movie twist aur turns ke saath aage bhadti rehti hai. Movie ke first half ki story second half ke compare mein jyada strong lagti hai. Aap murder mystery ke reveal hone tak movie  ko poori tarah se enjoy kar sakte hain. Agar aap ek sheedhi aur simple love story ya drama ya fir action dekhne mein interested hain to yeh movie aapko saayad samjh mein naa aaye. Lekin agar aapko movie ke saath experiments pasand hai, to yeh movie aapke taste se match kar sakti hai. Over all kaha jaaye to, movie full entertainer hai jo aapko aakhir tak disappoint nahi karti. Weekends par iss movie ko family aur friends ke saath enjoy kiya jaa sakta hai.

Facebook Comments

Recommended For You

About the Author: Prachi Kulshrestha

Leave a Reply

Your email address will not be published.

%d bloggers like this: