Movie Review : Badla, Amitabh Bachchan Aur Taapsee Pannu Starer Suspense Aur Thrill Se Bhari Hai Yeh Movie

Amitabh Bachchan aur Taapsee Pannu starer film Badla aaj finally release ho gayi hai. 2016 mein aayi Pink movie ke baad ek baar fir Amitabh Bachchan aur Taapsee Pannu ko bade screen par ek saath dekha jaa raha hai. Agar aap kaafi samay se ek achi thriller aur suspense movie ka wait kar rahe the to aapko yeh movie jarur pasand aa sakti hai. Movie ko Shahrukh Khan ke Red Chilies Entertainment ne produce kiya hai.

 

 

Movie ke lead role mein aapko Taapsee Pannu, Amitabh Bachchan, Amrita Singh, Antonio Akeel dikhai dete hai. Iss movie ko Sujoy Ghosh ne direct kiya hai jinhone Kahaani jaisi movie bhi audience ko di hai.

 

Movie ka trailer release hone ke baad se hi audience mein iss movie ko le kar kaafi excitement bani huyi thi. Jaisa ki humne aapko shuruaat mein bataya ki yeh movie suspense aur thrill ka mixture hai, aur yeh mixture aapko through out the movie milta bhi hai. Shuru se le kar aakhir tak yeh movie apne twist aur turns ke saath aage bhadti hai. Movie mein Taapsee Pannu Naina Sethi naam ki ek business lady ka role play kar rahi hain jo ki married hai aur ek mother bhi hai. Married hone ke baad bhi Naina Sethi ka ek boyfriend hai Arjun.

 

Naina Sethi aur Arjun ek dusre se chupkar milte hain jiska pata kisi 3rd person ko chal jaata hai. Jiski wajah se wah Naina ko blackmail karne lagta hai. Suddenly ek din Arjun ka murder ho jaata hai. Murder ke duaraan naina behosh ho jaati hai aur jaise hi use hosh aata hai police wahan aati hai aur Naina ko arrest kar leti hai. Lekin naina ka kahna hai ki yeh murder usne nahin kiya hai. Naina ke arrest hone ke baad Advocate Badal Gupta ke character mein Amitabh Bachchan ki entry hoti hai. Jahan bataya jaata hai ki wah apne 40 saal ke career mein koi bhi case nahin haare hain. Issi ke chalte Naina Sethi ka case bhi Badal Gupta ko de diya jaata hai.

Badal Gupta Naina sethi se uss raat huye har ek act ke baare mein sawal jawab karte hain aur 3 questions puchte hain. Unn 3 questions ke jawab milte hi Naina ka case solve ho sakta hai. Bas inhi 3 sawaalon ke jawab khojane mein yeh movie poori ho jaati hai. Lekin murderer ke baare mein jaanne ke liye aapko yeh movie theater mein dekhni hogi.

 

2 hours se kam duration ki yeh movie start to end story ko pakad kar rakhti hai. Har twist ke baad aapko lagta hai ki yaha murderer ka pata chal jaaega lekin aap aakhir tak khud ko galat saabit hota paate hain. Movie mein songs ko kuch khaas jagah nahi di gayi hai. Movie ka screenplay kaafi strong aur clean hai. Yeh movie aap family ke saath dekh sakte hain. Rahi baat iss movie ke suspense ki to wah aakhir tak bana rahta hai. Movie ka har scene aapki excitement ko bhadata hai. Movie ka best part hai iska climax, jahan Naina Sethi aur Advocate Badal Gupta ki twinning aakhir mein dikhai deti hai.

Facebook Comments

Recommended For You

About the Author: Prachi Kulshrestha

Leave a Reply

Your email address will not be published.

%d bloggers like this: