Launch Se Kuch Ghante Pehle Hi LG G7 Thinq Ke Color Variants Leak Huye

LG apna naya flagship smartphone G7 Thinq aaj NewYork mein launch karne waali hai, jise dekhne ke liye sabhi excited hain, lekin launch se kuch ghante pehle hi is premium smartphone ke colors leak ho chuke hain.

LG G7 Thinq three color variant mein launch hone ja raha hai. Black, Red aur Blue colors mein launch hone waala ye handset seedhe taur par Samsung ke Galaxy S9 aur S9+ ka competitor hoga. G7 Thinq ke in color options ki khabar famous German leakster Roland Quandt ne di hai.

Halaanki, is se pehle is handset ke specifications ke rumors aur leaks bhi saamne aaye hain, jinke according LG G7 Thinq 19.5:9 display ke saath aane wala pehla smartphone hoga jismein Quad HD+ resolution moujood hoga. Saath hi ye bhi kaha jaa raha hai ki ismein Octa Core Qualcomm Snapdragon 845 processor aayega jiski clock speed 2.7 GHz hogi.

LG G7 Thinq mein aapko two storage options mil sakte hain jinmein ek 4GB RAM ke saath aayega aur doosra 6GB RAM ke saath, lekin internal memory dono mein hi 64GB hone ki ummid hai. iPhone X dwara famous huye notch display ko bhi aap is smartphone mein dekh sakte hain.

Iske alawa ismein 3000mAh ki battery hogi jo Quacomm Quick Charge 4.0 support ke saath aayegi. Is smartphone ke camera ko lekar jo khabarein chal rahi hain, unke according ismein 16.3 MP ka dual rear camera setup hai jise center mein vertically fit kiya gaya hai. Halaanki fingerprint scanner ismein rear panel par hi hai, jo ki ek flagship high end smartphone ki pehchaan nahin hai. Agar ismein company in-display fingerprint scanner deti hai, to waakyi mein ye ekm premium smartphone hoga.

Pricing ko lekar charcha ye hai ki iski kimat 680 Euros ke aaspaas hogi yaani ki lagbhag 54,000 INR jo ki Galaxy S9 aur S9+ ke mukaable kam hai.

Filhaal to yahi kehna sahi hai ki iska first look aur iski pricing details ke liye kewal kuch ghante hi baaki hain.

Facebook Comments

Recommended For You

About the Author: Pooja Choudhary

Leave a Reply

Your email address will not be published.

%d bloggers like this: