Kya Aapko Pata Hai Aapka AADHAR Kahan Kahan Use Ho Raha, Check Kar Sakte Hain Iss Tarah Se

Government ke dawara diya gaya AADHAR aaj sabhi jagah compulsory ho gaya hai. Kahin par aap sirf ise dikha kar apna kaam karwa sakte hain aur kahin par aapko iski xerox copy deni padti hai. Lekin kya aapko sahi maayne mein yeh pata hai ki aapke dwara di gayi xerox copy sirf wahin use ho rahi hai jahan aapne use diya hai  ya fir uska use kahin aur bhi kiya jaa raha hai.  Agar aap iss baare sure nahin hai to yeh article poora padiye, jisse aap jaan sakenge ki aapka AADHAR kis kis jagah upyog mein laaya jaa raha hai.

Sabse pehle aapko bata dein ki AADHAR ko provide karne wali organisation UIDAI hain. Yeh service bhi aapko UIDAI ke dwara hi provide ki jaaegi. Iske liye aapko UIDAI ki official webstie par jaana hoga. Yeh website https://resident.uidai.gov.in hai. Iss link par click kar ke aap direct UIDAI ke official page par pahuch sakte hain. Iss website par pahuchne ke baad aapko Aadhar Service option dikhai dega. Jismein kuch aur blocks dikahi denge. Wahin block mein diye huye options mein se ek hoga Aadhar Authentication History. Yahan aapko click karna hai, jiske baad ek naya page aapke  saamne aaega.

Iss naye page par aapke Aadhar se judi kuch jaankari aapko deni hogi.  yahan aapko 2 blank boxes dikhai de rahe honge. Inn boxes mein se pehle box mein aapko apna 12 digit ka AADHAR number likhna hoga. Uske baad dusre box mein aapko ek security code likhna hoga jo ki usi box ke saath mein mention hota hai. Yeh process complete karne ke baad aapko send OTP par click karna hai. Jiske baad aapke AADHAR se jude huye mobile number par aapko ek OTP milega.

Iske baad aapke saamne kuch aur option aaenge. Jinmein aapko yeh batana hoga ki aap kis date se le kar kis date tak ki aur kis tarah ki jaankari nikalna chahte hai. Iske baad aapke registered mobile number par aaye huye OTP ko aapko yahan fill karna hai. Yeh sabhi jaankari dene ke baad aapke saamne statement page open hoga jismein aapke dwara ya jahan par bhi aapne apna AADHAR use kiya hai, uski jaankari di hogi.

Agar iss statement mein di gayi jaankari aapko doubtful lagti hai to aap ise lock bhi kar sakte hai. Saath hi iss di huyi statement ko download bhi kar sakte hain. Lock karne ke ke baad aap ise jarurat ke samay unlock bhi kar sakte hain. Iska fayda yeh hoga ki ise aapke alawa aur koi bhi use nahi kar paaega. Haal hi mein Income Tax department se release kiye gaye notice ke according aapko apne AADHAR  ko apne PAN card se link karna bhi jaruri ho gaya hai. Jis ke liye last date 31st March 2019 rakhi gayi hai.

Facebook Comments

Recommended For You

About the Author: Prachi Kulshrestha

Leave a Reply

Your email address will not be published.

%d bloggers like this: