Is Reason Se, Delhi High Court Ne Lagaaya ASUS Ke Zenfone Par Ban

ASUS ne kaafi jaldi hi India ke affordable smartphone market mein apne kadam jama liye the. Saath hi is company ne Zenfone Max Pro M1 aur Zenfone Max Pro M2 jaise stock Android smartphones ko launch karke, Xiaomi, Micromax jaisi companies ke affordable smartphones ko achhi takkar di. Last year ASUS ke Zenfone Max Pro M2 aur Max M2 ko bhi India mein kaafi achha response mila. Lekin ab kuch aisa hua hai ki Delhi Court ne is company par Zen ya Zenfone brand ke under smartphones sale karne ke liye stay laga diya hai.

Aaiye aapko bataate hain ki aakhir ye ‘BAN’ kyun laga hai.

Darasal, domestic company Telecare Network India Pvt. Ltd., jo ki ab tak Zem Mobiles ke naam se apne smartphones sale kar rahe the, ne ye claim kiya hai ki Zen ya Zen Mobiles trademark unka hai aur similar naam se agar koi rival company apne product ko India mein launch kar rahi hai, to wo unke product aur company ke liye damaging ho sakta hai.

Telecare Network India Pvt. Ltd. Ke is reason ko Delhi Court ne sahi tehraate huye, ASUS par Zenfone brand ke under phone launch karne se ban laga diya hai.

Zen Mobiles, jo ki ek Indian brand hai, is brand ke under 2008 se smartphones sale kar raha hai, jabki ASUS ka first Zenfone India mein 2014 mein launch hua hai.  Yahi kaaran hai ki, similar brand name se ASUS ko ban kiya gaya hai.

ASUS ke according, ‘Zen’ Buddhist philosophy ki ek common term hai aur isiliye unhone ise use kiya hai, lekin court ke according is case mein ise general ya common term nahin maana jaa sakta hai.

Filhaal ASUS par ban hai aur is case ki next hearing, Delhi High Court mein 10th July ko hogi. Ab dekhna ye hai ki ASUS par se ye ban hat jaata hai ya nahin aur ASUS ka Zenfone 6, jo ki India mein jaldi hi launch hone wala tha, ab launch ho paayega ya nahin.

Facebook Comments

Recommended For You

About the Author: Pooja Choudhary

Leave a Reply

Your email address will not be published.

%d bloggers like this: