India Mein Launch Nahin Honge Google Pixel 4 & 4 XL: Ye Hai Iska Reason

Google ne Europe mein hardware event mein kayi saare devices announce kiye, jinmein Pixel 4 & Pixel 4 XL most important devices hain. Iske alawa company ne Nest Mini, Pixelbook Go aur Pixel Buds ko bhi announce kiye hain.

Lekin saath hi company ne ye bhi confirm kar diya hai ki is baar Pixel phones India mein launch nahin kiye jayenge. Isko lekar company ne seedhe kaha hai, “ Is saal humne decide kiya hai ki Pixel 4 series India mein available nahin hogi. Current Pixel phones jo India mein already available hain, unhi ke saath hum continue karenge aur koshish karenge ki future mein Pixel Phones India mein available hon.”

Kya aap iske peeche ki wajah jaante hain ?

Darasal company ne seedhe taur par kuch explain nahin kiya hai, lekin Google Pixel 4 series project Soli ke saath launch ki gayi hai, jismein gestures based control technology hai jo ki 60GHz mm Wave frequency par kaam karti hai, jiske through aap face unlock, Motion sense, jaisi cheezein use kar sakte hain. Iske through aap gestures ke saath phone ko bina touch kiye hi images, tracks, change kar sakte hain, notifications read kar sakte hain. Lekin India mein ye 60GHz mm wave frequency public ke liye nahin hain.

Darasal, India mein 60GHz wave frequency locked hai aur ise use karne ke liye government se license ki zaroorat padti hai, jo ki normal public ke liye nahin hai. India mein ye frequency sirf military aur government projects mein hi use ki jaati hai aur aam janta ke liye ye locked hai. Google ko iske use ke liye India ki authorities se permission nahin mili aur yahi kaaran hai ki is frequency ke saath aane waale Google Pixel 4 & 4XL ko company India mein sale nahin kar sakti hai.

Google ka ye project Soli company ki hi Advanced Technology and Projects team ne 2015 mein develop kiya tha. Iske saath aane waala Pixel 4 isi technology ko face unlock ek liye bhi istemaal karta hai. Isi wajah se Pixel 4 ka face unlock bahut fast hai aur phone ki sabhi positions mein kaam karta hai. But unfortunately ye phones India mein nahin aayenge.

Facebook Comments

Recommended For You

About the Author: Pooja Choudhary

Leave a Reply

Your email address will not be published.

%d bloggers like this: