Gaming Smartphone Nubia Red Magic India Mein Launch Hua , Jaaniye Kya Hai Khaas Iss Phone Mein

Bhadate huye notch aur dual aur triple camera trend ke saath saath kuch companies ne iss saal gaming smart phone ka trend bhi bhada diya hai. Jahan kuch badi companies ne bahut hi attractive, rigid aur durable gaming smartphone iss saal launch kiye hain wahin saal ke aakhir mein Nubia ne bhi apna gaming smartphone India mein launch kar diya hai, jiska naam hai Nubia Red Magic. Nubia Red Magic ki baat ki jaaye to yeh phone poori tarah se apke gaming experience ko dhayan mein rakhte huye design kiya gaya hai. 

 

Phone ke specification se pehle baat kar lete hain iss phone ke design ki. Nubia Red Magic poori tarah se gaming phone hai jahan iski body design bhi gaming ko dhayan mein rakhte huye ki gayi hai. Nubia Red Magic triple anodized  aviation grade aluminum alloy se banaya gaya hai. Jahan iss par 5 tarah ke sandblast test kiye gaye hain. Phone ke back panel par air cooling ke liye chote chote 9 air slots diye gaye hai. Yeh air slots phone mein hone wali heating ko pass karne mein helpful honge. Iske alawa phone ke back panel par 16.8 Million RGB color light bhi milti hai.

Ab baat karte hain phone ke specification ke baare mein. Nubia Red Magic mein aapko milti hai 6 inch ki FHD+ display, jiska screen aspect ratio 18:9 hai. Yeh display NTSC  (National Television Standard Committee ) color gamut display hai, jahan RGB ki value thodi si vary karti hai. Phone mein 2.4Ghz ka Octa-core Snapdragon 835 processor diya gaya hai jo ki Adreno ke 540 GPU ke saath aata hai. Iske alawa phone mein aapko Android 8.1 Oreo dekhne ko milega jo ki Nubia Red Magic OS ke saath aata hai. Phone ke internal storage ki baat karein to Nubia Red Magic mein aapko 8GB ki RAM aur 128GB ki internal storage ka option dekhne ko milega.

Phone ke optics ki baat karein to yahan aapko 24MP ka rear camera dekhne ko milega jo ki 6P lens ke saath aur dual tone LED flash ke saath aata hai. Saath hi iss phone mein 8MP ka front facing camera bhi aapko milega. Phone mein gaming ke liye dedicated buttons bhi diye gaye hain. Iske alawa phone mein aapko finger print scanner ka option bhi milta hai.

Connectivity ki baat ki jaaye Nubia Red Magic dual nano sim ko support karta hai. Phone mein dual band Wi-Fi, Bluetooth, GPS, GLONASS, Beidou ka support bhi milta hai. Nubia Red Magic phone mein aapko 3800mAh ki battery di gayi hai jo ki fast charging ko support karti hai. Saath hi phone mein USB type -c port aur 3.5mm headphone jack ka option bhi milta hai.

Nubia Red Magic ki Indian market mein price Rs 29,999 rakhi gayi hai. Jahan yeh phone Amazon exclusive sale ke liye rakha gaya hai. Amazon ki website par yeh phone 20 December se sale ke liye available hoga.

Facebook Comments

Recommended For You

About the Author: Prachi Kulshrestha

Leave a Reply

Your email address will not be published.

%d bloggers like this: