India Mein Bane Inn Top 5 Movie Theatres, Jinmein Ek Baar Movie Dekhna Ka Experience Aapko jarur Karna Chaiye

Movies dekhna lagbhag har kisi ko pasand hota hai. Lekin jab baat aati hai movie mein dikhaye jaane waale content ki to har kisi ki choice alag ho jaati hai. Inn sab ke baad bhi agar koi cheej movies ke chahne walon ko jodti hai to woh hai movie theatres. India mein aapko low budget movie theatre se le kar premium movie theatre tak milenge. Aise hi movie theatres ko pasand karne walon ke liye aaj hum laaye hain India ke behatreen movie theatre ki list. Jahan movie dekhne ka experience aapko life mein ek baar jarur karna chaiye.

 

1. Raj Mandir Cinema 

Pink city kahe jaane wale sahar Jaipur mein bana yeh cinema June 1976 mein banaya gaya tha. Aaj bhi yeh cinema house Jaipur ke tourist point mein se ek maana jaata hai.  Iss cinema house mein aapko 1165 seats ki capacity milti hai, jahan seats premium, diamond, emerald aur ruby category mein divide hai. Ticket ki price ke baat ki jaaye to lowest price Rs 100 aur highest price Rs 400 tak yahan rakhi jaati hai. Itna purana hone ke baad bhi yeh movie theatre aaj bhi apne patrons ko reasonable price mein best service provide kar raha hai.

 

2. PVR Director’s Cut

PVR Director’s Cut Delhi ke Ambience mall ke andar bana hua theatre hai. Jahan aapko high-end services ke saath movie dekhne ka maaza milta hai. Yeh theatre poori tarah se luxury amenities se bhara hua hai. Yeh theatre 3D enable projection technology ko use karta hai. Iss theatre ke ticket ki minimum price Rs 500 aur maximum price Rs 2000 tak rakhi jaati hai. Khaas baat yeh ki yahan audience ki demand ko dekhte huye bhi puraani movies screen par dikhayi jaati hai.

3. Mayajaal

Mayajaal Chennai mein bana hua ek movie theatre hai jo ki 30 acres ki property par bana hua hai. Iss theatre mein 16  multiplex screen hai.  Aisa ka yeh dusra sabse bada multiplex screen wala theatre hai. Yahan ticket ki price kaafi reasonable rakhi jaati hai jo ki aapko Rs 190 se le kar Rs 350 tak milti hai. Yeh multiplex 1997 mein banaya gaya tha jahan aaj bhi iss multiplex theatre mein 80 shows rojana play kiye jaate hain.

4. Inox Laserplex CR2

Mumbai ke Nariman Point area mein bana hua yeh Inox Laserplex CR2 theatre ek luxury theatre hai. Jahan aapko seating ke liye fully recliner seats milti hai . Iski alawa  yeh theatre 3D movies ke projection ke liye bhi jaana jaata hai. Yahan different type ki screen ko implant kiya gaya hai jise ‘Insignia’ kahte hai.  Iss theatre mein aapko ticket ke liye minimum Rs 166 aur maximum Rs 1199 dene padenge, jo ki seating class ke according divide hain.

5. Aries Plex Cinema

Kerala mein bana yeh multiplex cinema house south India mein bana best theatre hai. Jahan audience ko comfort provide karne ke liye seats ko Belgium  se import kiya gaya hai. Iske alawa yeh theatre apne 4K projection ke liye bhi jaana jaata hai. Yahan par aapko movie dekhne ke liye minimum ticket price Rs 150 aur maximum ticket price Rs 500 dena hoga.

Facebook Comments

Recommended For You

About the Author: Prachi Kulshrestha

Leave a Reply

Your email address will not be published.

%d bloggers like this: