Google Pixel 3 aur 3 XL, JD.com Par Dekhe Gaye; Price Aur Design Reveal Huye

iPhones ke baad, ab high-end smartphones ki baat karein to, sabhi ko Google Pixel 3 aur 3 XL ka intezaar hai. Aur ab jab inke launch mein kewal 2 weeks hi baaki hai, to Pixel 3 ko Chinese e-commerce site par price ke saath dekha gaya hai.

Is Chinese e-retailer ka naam JD.com hai, jahaan Pixel 3, 4,999 yuan (approx. 53,000 INR) ke price tag ke saath listed hai. Well, ye price tag kitna sahi hai, ye to launch ke samay hi pata chal sakega.

Image Credit: WCCF Tech

Lekin ek khaas baat, jo aap mein se shayad kuch logon ko pata hogi aur kuch ko nahin, wo ye hai ki Google ki services Chinese market mein ban ki hui hain. Google apni Pixel series, China mein sale nahin karti. To aap hi bataaiye ! hua na ye interesting fact, ki jahaan cheez bikni hi nahin hai, wahin sabse pehle available hui.

Google Pixel 3, JD.com par listed hai, iske screen shots sabse pehle WCCFTech dwara dekhne ko mile hain, jahaan se ab iski pricing details hata di gayi hain.

Anyways, Google Pixel 3 aur 3 XL, NewYork aur Paris mein October 9, 2018 ko launch hone jaa rahe hain, jiske liye company launch ke invites bhi bhej chuki hai.

Is screenshot mein Pixel 3 Black and White colors mein dikh raha hai aur waakyi color kaafi attractive lag raha hai. Iske alawa aap dekh sakte hain, ki ismein aapko single rear camera with flash milne waala hai, jo ki pehle bhi rumors mein aa chuka hai. Saath hi center mein fingerprint scanner bhi diya gaya hai, jisse fans ko niraasha ho sakti hai, kyunki ab flagship smartphones mein in-display fingerprint sensor ka trend hai.

Image Credit: Android Headlines

Iske alawa isi site par Pixel 3 XL ko bhi dekha gaya hai, jismein single rear camera aur fingerprint scanner back par diye gaye hain. Jabki front par aapko notch display aur dual selfie shooters milte hain. Lekin Pixel 3 mein normal display, jo ki top aur bottom bezels ke saath aati hai, wahi milegi.

Ummid hai, ki launch ke nazdeek aate aate, in dono hi smartphones ke aur bhi leaks aur rumors zaroor aayenge.

Facebook Comments

Recommended For You

About the Author: Pooja Choudhary

Leave a Reply

Your email address will not be published.

%d bloggers like this: