Galaxy Note 10 & Note 10 Pro Is Date Ko Ho Sakte Hain Launch, Galaxy A90 Ki Bhi Details Aayi Saamne

Samsung ki Galaxy Note series, is brand ki sabse prestigious series hai, jiska intezaar sabhi ko hota hai. Is baar bhi stylus ke saath launch hone waali, is Galaxy Note 10 series ke liye sabhi excited hain, jiske leaks bhi aane shuru ho gaye hain. Kuch din pehle is smartphone ke design leaks humaare saamne aaye the aur ab iski launch date aur ‘Pro’ moniker ke saath aane waale smartphone se judi khabrein hamaare saamne hain.

Kaafi reports se ye saamne aaya hai ki company is baar Galaxy Note 10 ke saath Galaxy Note 10 Pro ko bhi launch karne waali hai aur inka officially launch 10th August ko ho sakta hai. In smartphones ki launch date Economic Times ki ek report ke through saamne aayi hai.

In dono smartphones mein aapko Galaxy S10 series ki tarah 25W fast charging support milne waala hai. Halaanki pehle rumors ye aa rahe the, ki Galaxy Note 10 Pro mein 45W fast charging mil sakti hai, jo ki S10 series ke mukaable almost doguni fast hogi, lekin ab aisa nahin hai. Bataaya jaa raha hai ki 45W fast charging ke saath aane wala Samsung ka phone koi aur hi hai.

XDA Developers ke writer, Max Weinbach ne ek Tweet karke share kiya hai ki aane waale Galaxy Note 10 Pro mein aapko 25W fast charging hi milegi, jabki upcoming Galaxy A90 wo phone hoga, jismein company 45W fast charging degi.

Galaxy Note 10 series ke baad, Galaxy A90 ki bhi kaafi charcha hai, jise haal hi mein Geekbench par bhi dekha gaya hai aur pata chala hai ki ye handset Snapdragon 730 processor ke saath aayega. Saath hi ismein Android 9.0 Pie OS hoga aur 6GB ki RAM aapko ismein milegi.

Waapas, Note 10 aur Note 10 Pro par aate hain, jinke launch mein abhi thik 2 months baaki hain. Lekin inke specs kaafi had tak saamne aa chuke hain. Galaxy Note 10 mein 6.39 inch ki display ho sakti hai, jabki Note 10 Pro mein aapko isse aur thodi badi display milegi, jaise ki aap image mein dekh sakte hain. Wahin Note 10 LTE support ke saath aayega, jabki 10 Pro mein 5G connectivity mil sakti hai.

Iske alawa in dono phones mein har baar ki tarah horizontal camera setup nahin, balki vertical camera setup hoga aur Note 10 Pro mein aapko ek rear camera extra milega.

Well, filhaal ke liye itna hi, hopefully aane waale weeks mein Galaxy Note 10 series ki aur bhi information saamne aayegi, jo hum aapke saath phir se share karenge.

 

Facebook Comments

Recommended For You

About the Author: Pooja Choudhary

Leave a Reply

Your email address will not be published.

%d bloggers like this: