Biography Par Based Yeh 5 Movies Release Hone Wali Hain Iss January Mein

Movies dekhna kise pasand nahi hota hai aur agar baat ho kise ke jeewan se judi sachhi ghatna par bani movies ki to har koi dekhna pasand karta hai. Issi tarah ki movies iss saal aa rahi hain, jahan aapko inn movies ke dwara kuch mahaan logon ke jeewan ke baare mein aur kuch sachhi ghatnao ke baare mein jaanne ko milega. Inhi reality based movies ki list yahan hum aapke liye le kar aaye hain.

1. URI : The Surgical Strike

Aditya Dhar dwara direct ki gayi yeh movies 2016 mein Indian army ke dwara Pakistan par ki gayi surgical strike par banayi gayi hai jo ki uri mein huyi thi. Movie ke lead role mein aapko dikhai denge Vicky kaushal, Yami Gautam, Paresh Rawal, Kriti Kulhari. Yeh movie poori tarah se action aur thriller se bhari huyi hai. Movie mein Vicky Kaushal ek army officer ka role play karte huye nazar aaenge wahin Yami Gautam ek investigator officer ki form mein nazar aati hain. Inn sab se upar Paresh Rawal ka role bhi ek Senior officer ka dikhaya gaya hai. Yeh movie 11 January 2019 ko release hogi.

 

2. The Accidental Prime Minister

Haal hi mein release huye iss movies ke trailer ne political party ke liye kaafi paresaaniyan khadi kar di hain. Yeh movie Congress party se select kiye Former Prime Minister Dr. Man Mohan Singh ke political life par based hai. Jahan uss samay huye corruption aur controversies ko movie mein dikhaya gaya hai. Movie ke lead role mein aapko Anupam Kher, Suzzane Bernet, Akhsay Khanna jaise actor nazar aate hain. Yeh movie bhi 11th January 2019 ko release hogi.

 

3. Thackeray 

Indian political party Shiv Sena ke leader Bal Kesav Thackeray ke jeewan par bani yeh movie Thackeray 23rd January 2019 ko release hone wali hai.  Iss movie ko 2 languages Marathi aur Hindi dono mein hi shoot kiya gaya hai. Movie ko direct kiya hai Abhijit Panse ne aur iss movie ke lead role mein aapko dikhayi denge Nawazzudin Siddiqui aur Amrita Rao. Jahan Nawazzudin Siddiqui Bal Thackeray ka character play karte huye nazar aaenge. Yeh movie Bal Thackeray ke shuru se le kar jeewan ke aakhiri samay tak ke political safar ko dikhati hai. Jahan  yeh dikhaya gaya hai ki unhone kis tarah desh mein Marathi community ko samman dilaane ki ladai ladi hai.

4.  Manikarnika : The Queen Of Jhansi

Jhansi ki rani ke jeewan par banayi gayi yeh movie unke Manu se Manikarnika banane tak ke safar ko darshati hai. Movie mein Manikarnika ka character Kangana Ranaut play kar rahi hai. Inke alawa movie ke narration mein aapko Amitabh Bachchan ki aawaz sunai degi. Movie 1857 mein huyi war ko dikhati hai jo ki angrezon aur Jhansi ki rani Manikarnika ke beech huyi thi. Yeh movie Republic Day se sirf ek din pehle 25th January ko release hone wali hai.

5. Super 30

Bihar ke Patna se belong karne wale Mathematician Anand Kumar ke jeewan par bani biopic Super 30 25th January ko release hone wali hai. Movie ke trailer mein dikhaya gaya hai ki wah ek bahut hi poor family se belong karte the, Jahan unke pass apni study ko complete karne ke liye bhi paise nahi the. Aisi situation mein unhone kaise ek organization banayi jo ki IIT mein students ko entrance clear karne mein help karti hai. Iss organization ko naam diya gaya hai Super 30. Issi Super 30 organization par based hai yeh movie. Iss movie ke lead role mein dikhayi denge Hritik Roshan, Mrunal Thakur, Pankaj Tripathi.

Facebook Comments

Recommended For You

About the Author: Prachi Kulshrestha

Leave a Reply

Your email address will not be published.

%d bloggers like this: