5 Worst Smartphones Of 2018; Here Is The List

2018 khatm hone ko hi hai aur hum aur aap naye saal ka welcome karne ke saath saath, upcoming smartphones ko lekar bhi excited hain. Saath hi logon ko is saal mein launch huye behtareen smartphones ki list ka bhi intezaar hoga aur ye list bhi hum aapse zaroor share karenege, lekin kya aap ye jaante hain ki is saal mein kayi smartphones ke beech wo phones bhi launch kiye gaye, jinhein kisi ne pasand nahin kiya aur unhein ‘worst smartphones of 2018’ ki list mein shaamil hona pada.

Best handsets se pehle, aaiey hum aapko bataate hain, un smartphones ke baare mein jinhein is saal mein kaafi kharaab response mila aur wo bane worst smartphones of 2018.

Honor 7A

Honor 7A ko India mein May 2018 mein launch kiya gaya tha aur ab is smartphone ko aap Flipkart se 7,999 INR ki kimat par kharid sakte hain. Halaanki is smartphone ke looks achhe hain, lekin ye overall plastic ka bana hai. Iska camera aapko kisi hadd tak satisfactory images deliver karta hai, lekin ye smartphone performance ke maamle mein achha nahin hai. Ismein 3GB+32GB storage ke saath Snapdragon 430 chipset hai. Is handset mein aapko kayi performance issues aa sakte hain, jaise ki multiple apps usage, multiple tabs open karne par bhi problem aati hai, apps slowly open hoti hain aur saath hi iska face unlock bhi achha kaam nahin karta hai.

Saath hi Honor 7A mein aap Asphalt 8/ 9 jaise heavy games nahin khel sakte aur ye handset jaldi heat ho jaata hai. Isi tarah ki problems is price range mein accept nahin ki jaa sakti hain. Aur yahi kaaran hai ki ye phone worst smartphones of 2018 ki list mein shaamil hua.

Samsung Galaxy J6

Ye smartphone bhi May mein hi launch hua, halaanki company ne ise affordable range mein launch karne ki koshish ki, lekin ye bhi performance mein khraab nikla. Galaxy J6 mein aapko octa-core Exynos 7870 processor diya hai, jo ki is price range mein aapko kaafi disappoint karta hai. Is smartphone ka design aapko thoda refreshing lagta hai, lekin performance aur camera disappointing hain. Is price range mein isse behtar aapko kayi handsets mil sakte hain. Jaise ki Redmi Note 5 Pro, Realme 2 Pro, Realme 1, etc.

Moto G6 Play

Moto G6 Play bhi ek budget smartphone hai, jise aap 11,999 INR mein kharid sakte hain. Is smartphone mein aapko 18:9 display milti hai, Snapdragon 430 processor milta hai, jabki MediaTek Helio P60 chipset, isse kahin jyada powerful hai, jo ki aapko Realme 1 mein kewal 10,490 INR mein mil raha hai. Iske alawa is price range mein jahaan bahut se phones full HD+ display ke saath launch huye hain, wahin ismein HD+ display mil rahi hai. Again hum performance, design aur display ko dekhein, to Zenfone Max Pro M1 aur Realme 1, isse kaafi behtar hain.

OnePlus 6T McLaren Edition

OnePlus 6T ka special McLaren Edition bhi hamaari worst smartphones of 2018 ki list mein shaamil hai. Is smartphone mein performance ko lekar koi issue nahin hai, ye Snapdragon 845 chipset ke saath kaafi achhi performance deta hai, lekin ismein OnePlus 6T se kuch khaas alag nahin hai. Company ne iske design mein kuch changes kiye hain, jo dekhne mein average hai, lekin har baar special edition ke saath company ek special case bhi offer karti thi, jo yahaan missing hai aur jo case iske saath milta hai, wo iske rear panel ko chupa deta hai, jiske baad ye ek standard 6T phone hi hai.

OnePlus 6T McLaren Edition mein ek aur nayi cheez jo company ne offer ki wo hai, 10GB RAM. Lekin OnePlus 6T mein bhi aapko 8GB RAM option milta hai aur is special edition mein extra 2GB RAM se performance ya kisi bhi chiz mein koi khaas fark nahin pada hai.

Ye phone worst smartphones of 2018 ki list mein isiliye shaamil hai, kyunki kewal design aur unnecessary extra 2GB RAM ke liye koi bhi 9,000 INR extra kyun dega. OnePlus 6T ke 8GB+128GB option ki kimat 41,999 INR hai, jabki McLaren Edition aapko 50,999 INR mein mil raha hai.

Oppo F7

Worst smartphones of 2018 ki list mein hum last name, Oppo F7 ka lenge. Is smartphone ki kimat is samay 21,990 INR aur 26,990 INR hai, jo ki iske 4GB+64GB aur 6GB+128GB storage variants ki kimat hai. Is smartphone ko company ne March mein MediaTek Helio P60 ke saath launch kiya tha, lekin kuch months ke baad hi, Oppo ki sub-brand Realme ka first smartphone bhi isi chipset ke saath lagbhag half price mein launch kiya gaya. Oppo F7 ke 4GB RAM version ki launch price 21,990 INR thi, jabki Realme 1 ka 4GB RAM version kewal 10,990 INR mein launch hua.

Iske alawa Oppo F7 mein 6GB RAM jiski launch price 25K se upar thi, usmein bhi aapko fast charging nahin di gayi hai. Saath hi yahaan single rear camera hai. Wahin aap same company ka August mein launch hua Oppo F9 Pro dekhein to iske 6GB model ko 23,990 INR mein waterdrop notch aur VOOC flash charge technology ke saath launch kiya gaya.

In sabhi reasons se Oppo F7 ek flop smartphone prove hota hai.

Well, ye to thi hamaari list, lekin aap bhi comments section mein zaroor bataaiye ki aap ko is saal ka kaun sa smartphone khraab laga.

Facebook Comments

Recommended For You

About the Author: Pooja Choudhary

Leave a Reply

Your email address will not be published.

%d bloggers like this: