5 Saal Se No.1 YouTube Channel Ko Peeche Kar, T-Series Banne Jaa Raha Hai World Ka No.1 YouTube Channel, Ye Hai T-Series Ki Kahaani

India ka largest music record label, T-series ko aaj kisi bhi introduction ki zaroorat nahin hai. Lekin aap soch rahe honge ki humne aaj iski charcha kyun ki. Darasal T-series, sirf ek music company hi nahin hai, balki is samay duniya ka second most popular YouTube channel bhi hai, aur bahut hi jaldi five years se lagataar top par rahe YouTube channel ko peeche chodh, T-series world ka top Youtube channel ban sakta hai.

2018 ke starting mein T-series ke YouTube subscribers kewal 30 million the aur kuch hi months mein inki ginti 71 million ke paar jaa chuki hai.

Is samay world ka top YouTube channel hai PewDiePie, jiske 71, 937, 586 subscribers hain, wahin T-series ke subscribers ki sankhya 71, 734, 794 hai. Jaisa ki aap dekh hi rahe hain ki dono ke subscribers ki ginti mein kaafi kam faasla reh gaya hai. Aur jitni tezi se T-series ke subscribers badhte jaa rahe hain, aisa lag raha hai ki kuch hi dinon mein PewDiePie ko T-series peeche chodh kar, No. 1 YouTube channel khitaab T-series apne naam kar lega.

Lekin T-series ki kahaani aaj se shuru nahin hui hai, balki ye 1983 se start ho chuki thi. Aaiye itne saalon ki kahaani par ek nazar daalte hain.

Super Cassettes Industries Private Limited, jo ki T-series ke naam se mashhoor hai, iski shuruaat 1983 mein Gulshan Kumar ne ki thi, jo ki apne samay ke sabse famous devotional singer the. 1990 mein aayi Aashiqui film ke songs se T-series ko ek Bollywood mein bhi ek nayi pehchaan mili aur uski 20 million copies, T-series ke desh bhar mein sale ki.

Lekin iske baad, assassination ke kaaran Gulshan Kumar ki jaan chali gayi. D-company dwara ek moti rakam ki demand ko poora naa karne par, D-company ke Abdul Rauf ne 1997 mein Gulshan Kumar ko unhin ke dwara banwaaye gaye Jeeteshwar Mahadev Mandir ke saamne goli maar di.

Yahaan se T-series ki baagdor sambhaali Gulshan Kumar ke bete Bhushan Kumar ne, jo us samay sirf 19 saal ke the aur unke chote bhai Krishan Kumar ne, jinhein aapne puraani Bollywood film mein as an actor bhi dekha hoga.

Lekin YouTube ki duniya mein T-series ne year 2006 mein apna pehla kadam rakha, but apni music videos ko unhone 4 saal baad, yaani ki 2010 mein upload karna shuru kiya. 2010 se T-series ke music videos aur film ke trailers, YouTube par nazar aane lage. Iske baad YouTube par T-series ke subscribers dheere dheere badhne lage.

Pichle kuch samay se T-series Mixtape ke music videos ke poori duniya ko deewaana sa bana diya, jismein 2 Bollywood songs aur 2 singers ki jugalbandi nazar aati hai.

2018 mein , T-series ke subscribers 30 million the aur dheere dheere badhne lage. 2-3 months ke baas, everyday 1,50,000 subscribers increase hone lage aur finally 10th September, 2018 ko T-series ne apne 50 million subscribers poore kiye, jiske baad use Ruby Play Button mila. Iske baad ye channel duniya ka second YouTube channel bana, jisne 61 million subscribers ki counting ko touch kiya.

Ye subscribers kewal T-series channel ke hain. Agar aap T-series group ke sabhi channels jinmein T-Series Tamil, T-Series Telugu, Bollywood Classics, Bhakti Sagar, Apna Punjab, T-Series Regional, jaise 29 channels shaamil hain, ke subscribers ko include karein, to T-series group, YouTube ke 100 million subscribers ko poora kar chuka hai.

Lekin yahaan sirf ek channel ki baat karte hain, to T-series badi tezi se aage badh raha hai aur apne rival channel PewDiePie ko takkar de raha hai.

Aap soch rahe honge ki PewDiePie kaun sa YouTube channel hai, jo pichle five years se top par hai. Darasal, ye ek comedy channel hai, jiske founder ek Swedish jokester aur video game geek Felix Kjellberg hain. 2013 se continuously inka channel YouTube par top kar raha hai, aur pichel 5 saal se inke No.1 channel ke record ko India ka Youtube channel T-series jaldi hi tod sakta hai.

Lekin T-series poore world mein aisa No.1 channel hai, jo ki non-English language mein hai. Records dekhein to, YouTube par top karne waale channels ke founders, jyadatar, comedian, young, adult males hain. Wahin T-series YouTube channel ke founder, Bhushan Kumar, is samay 40 years ke businessman hain, jinhone apne father ke jaane ke baad, kewal 19 ki age mein T-series ko sambhaala aur yahaan tak lekar aaye.

Well, ye thi ek choti si story, India ke top YouTube channel aur World ke second top YouTube channel ke baare mein. Aap kya kehte hain iske baare, apne comments ke zariye humein zaroor bataaiye.

 

Facebook Comments

Recommended For You

About the Author: Pooja Choudhary

1 Comment

Leave a Reply

Your email address will not be published.

%d bloggers like this: