5 New And Innovative Technologies Jo 2018 Ke Smartphones Mein Sabse Pehle Dekhi Gayin

2018 ab jaane ko hai, aur naya saal aane ko aur agar technology world mein is year ka contribution dekhein, to bahut hi khaas raha. 2018 mein specially smartphone market mein aapne aur humne kayi nayi technologies dekhin hain. Halaanki smartphone market ko gaur se dekhne waalon aur fans ko ye technologies pasand aayin bhi aur nahin bhi.

Smartphones to bahut aaye, lekin kaun si innovative technologies ke saath aaye, aaiye ye zara ek baar phir se jaante hain.

In-display fingerprint scanner

Sabse pehle baat karte hain, in-display fingerprint scanner ki, jo ki sabse pehle humein Vivo ke smartphone mein dekhne ko mili. Vivo X20 Plus UD, is technology ke saath aane wala pehla smartphone tha, jo ki January 2018 mein launch kiya gaya. Halaanki, is technology ke saath aane wala ye best smartphone nahin hai, lekin sabse pehle iske saath Vivo ne hi humein rubaru karaya. Iske baad, Oppo R17 Pro, OnePlus 6, Vivo V11 Pro, Vivo NEX aur Huawei Mate 20 series ke smartphones mein humein ye technology aur behtar hoti hui nazar aayi. Iske alawa Samsung bhi ab apna in-display fingerprint sensor ke saath first smartphone launch karne wala hai.

Super VOOC Flash charge, Warp Technology

Is year mein humne ek aur aisi technology dekhi, jo ki dheere dheere, logon ke liye ek most important feature ban gayi hai. Achhe phones mein big battery ke saath fast charging support bhi kaafi important ho chuki hai.

Jee haan ! hum yahaan fast charging support ki baat kar rahe hain, jo ki aaj kal 15,000 INR se upar milne waale sabhi phones mein aapko milta hai. Lekin OnePlus ki Dash Charge technology, Oppo ki VOOC Flash charge technology, jiska tag line raha – ‘5 min charge, 2 hours talk’, ne fast charging ki definition hi badal di.

Iske baad haal hi mein aaye Oppo ke Super VOOC Charge technology ne fast charging ke maamle mein sabko peeche chod diya. Yahaan aapko 10V / 5A ka charger milta hai, jo 10 minutes mein aapko handset ko 40% aur 36 minutes mein full charge kar deta hai. Wahin OnePlus 6T McLaren Edition ke saath company ne apni nayi Warp charging technology showcase ki, jo ki is handset ko 1 hour mein full charge kar deti hai.

Slider mechanism

Smartphones ko maximum screen ke saath launch karne ke liye company ne utne area mein notch fit kiya, jismein camera aur zaroori sensors aa sakein. Lekin Vivo ne apne smartphone NEX mein without notch pure full view display diya, jismein thinner bezels the aur camera ke liye company ne slider mechanism / pop-up selfie camera ki technology duniya ke saamne rakhi. Ismein jaise hi aap front camera app open karte hain, ye pop-up selfie camera, apne aap top-edge se nikalkar bahaar aa jaata hai. Iske baad Oppo ne bhi slider mechanism ka istemaal kiya. Oppo ka flagship smartphone, Find X bhi slider mechanism ke saath aaya, jismein front aur rear cameras moujood the.

Iske baad October 2018 mein Xiaomi ke bhi isi technology ko apnaate huye, Mi Mix 3 launch kiya.

Multiple number of rear cameras

Dual rear cameras ka trend to hum kaafi samay se dekhte aa rahe hain. 2018 mein mid-range hi nahin, balki mostly affordable handsets mein bhi dual rear cameras moujood hain. Lekin 2018 mein nayi baat ye hai ki, is saal mein triple rear aur four rear cameras ke saath smartphones dekhne ko mile. Sabse pehle Huawei ne triple rear cameras ke saath P20 Pro ko market mein utaara. Iske baad Huawei Mate 20 Pro series, Galaxy A7, Oppo R17 Pro jaise kayi smartphones mein triple rear cameras dekhne ko mile.

Iske baad inhein peeche chod, Samsung ne Galaxy A9 (2018) launch kiya, jo ki four rear cameras ke saath aane wala world ka first smartphone hai.

Different sizes of notch

Agar hum ye kahein ki, Apple ke iPhone X ne 2018 ko notch ke naam kar diya, to ye galat nahin hoga. Is year mein sabse pehle notch ke saath iPhone X launch hua, jiske baad, sabhi choti badi smartphone banaane waali companies ne notch display ke saath smartphone launch karna shuru kar diya. Ab tak kewal Samsung hi ek aisi company hai, jiska koi phone notch ke saath nahin aaya. Jabki Oppo, Vivo, Micromax, LG, Honor, Huawei, Xiaomi, in sabhi ne affordable se mid-range smartphones mein notch display di hai.

Pehle iPhone x like notch aayi, phir kisi kisi phone mein wide notch bhi dekhne ko mili aur iske baad waterdrop notch ke saath aaye smartphones logon ko kaafi attractive lage. Realme 2 Pro, OnePlus 6T, Vivo V11 Pro jaise handsets mein waterdrop notch ko fans ne kaafi pasand kiya.

Lekin iske baad, 2018 ke end mein Huawei ne Nova 4 launch kiya, jismein aapko punch-hole ke size ka notch dekhne ko mila hai. Is handset mein jo hu dekh rahe hain, wo in-display camera nahin hai, balki phone ke left side mein display mein punch-hole karke camera fit kiya gaya hai. Iske baad Samsung ke Galaxy A8s mein bhi humne kuch dinon pehle yahi technology dekhi hai.

Lekin yahaan par ye kehna sahi hoga ki wide notch ka 2018 ke saath hi end ho raha hai. Jabki dewdrop notches 2019 mein bhi dekhne ko milengi.

AI / AR Technology

2018 mein jitney bhi flagship chipsets aaye hain, unmein dedicated NPU hai, jo machine learning aur AI tasks ko, kam power lete huye, efficiently karne mein help karta hai. Isi ke saath aane waale samay ke liye, AI / AR  technologies ki neenv 2018 mein taiyaar ho gayi hai.

Ab hamaare phones mein AI applications ko successfully run karne ke liye hardware hai aur aane waale samay mein developers iska faayda uthaate huye, kayi AI apps launch karenge, jinka istemaal karne se, hamaara smartphone experience next level par jayega.

Lekin ye kehna sahi hai ki AI ki shuruaat 2018 se hi hui hai.

Reverse wireless charging technology

Wireless technology ke baare mein to aapne suna hi hoga, lekin 2018 mein Huawei ne isse juda kuch naya karke dikhaya hai. Company ne apne haal hi mein launch huye phoneMate 20 Pro ke saath Reverse wireless charging technology duniya ko dikhaayi hai, jo waakyi mein thodi anokhi hai.

Mate 20 Pro duniya ka pehla phone hai, jismein Reverse wireless charging technology hai. Ismein wireless charging ko support karne waale kisi bhi phone ko agar aap Mate 20 Pro ko ulta kar yaani ki uske rear panel par rakh denge, to wo charge hona shuru ho jayega. Abhi tak ye technology, sirf Huawei ne di hai, lekin ummid hai ki yahaan ye kuch aur leading companies bhi ise zaroor adopt karengi.

Facebook Comments

Recommended For You

About the Author: Pooja Choudhary

Leave a Reply

Your email address will not be published.

%d bloggers like this: