26 Saal Ki Age Mein 18 Patents Kar Chuke Hain Apne Naam, Jaaniye India Ke Dusre Phunsukh Wangdu, Ajinkya Ke Baare Mein

Aaj hum aapko batane wale hain India ke dusre Phunsukh Wangdu ke baare mein jinka naam hai Ajinkya Kottawar. Maharashtra ke Yavatmaal town ke Paatanbori village ke rahne wale Ajinkya ne sirf 26 saal ki umar mein 18 patents apne naam kar liye hain. Ji ha! itna hi nahi 19th patent ki taiyari bhi chal rahi hai. Agar aapne ‘3 Idiots’ movie dekhi hai to aapko jarur pata hoga ki Phunsukh Wangdu ne kis tarah ke chote chote invention kar ke dikhaya tha jo ki real life mein use hote the. Thik waise hi Ajinkya ne apne village mein aas pas ke environment ko dekhte huye jaruri invention kiye jo ki hum sabki life ko easy bana sakte hain. Waise aapko bata dein ki Ajinkya real life Phunsukh Wangdu ( Sonam Wangchuk) se bhi mil chuke hain saath hi unke sath kaam bhi kiya hai.

 

 

Ajinkya bachpan se unn curious students mein se ek the jinhe theoretical nahi practical knowledge mein interest hota hai. Jiske chalte hi unhone apni graduation ke liye Mechanical Engineering ko chuna. Apni graduation ke duaraan unhone 2 patents design kiye. Pehla invention graduation ke 2nd year mein kiya jo “A VARIABLE VOLUME PISTON CYLINDER ASSEMBLY” tha. Yeh ek aisi machine thi jiski help se kisi bhi vehicle ke CC (Cubic Centimeter Capacity Of Cumbusion Cylinder) ko sirf button push kar ke alag alag CC mein change kiya jaa sakta tha.

 

Ajinkya ne next invention graduation ke final year ke duaraan kiya jo ki “A MULTI FUEL INTERNAL COMBUSTION ENGINE” tha. Iss engine ko petrol, diesel, battery ya mix fuel ki help se chalaya jaa sakta tha. Ajinkya ne explain karte huye bataya ki jahan battery wale vehicle full charge karne par maximum 120Km chal paate hain wahin yeh engine 1 litre petrol aur full battery charge par 300 Km ki distance cover kar sakta hai. Unke iss invention ko dekhte huye Mahindra company ne unhe appreciate kiya aur iss patent ke liye unke saath collaboration bhi kiya hai.

 

Year 2015 tak Ajinkya 12 patents apne naam kar chuke the. Jiske baad unhone real life Phunsukh Wangdu aka Sonam Wangchuk ko mail kiya aur milne ki ichha jaahir ki. Jis ke baad unhe Sonam Wangchuk se milne ka mouka bhi mila. Ajinkya Sonam Wangchuk ke saath mil kar kaam karna chahte the lekin Sonam ne unhe suggest kiya ki wah yeh sabhi invention apne village mein jaa kar karein jis se unke apne logon ko help milegi. Ajinkya ne uhne follow kiya aur apne village wapas aa gaye. Jahan apne village wapas aane ke baad unhone apni knowledge ko village ke 22,000 students ke saath share kiya.

 

 

Ajinkya ne 2018 mein “Gyan Foundation” ki shuruaat ki. Jahan wah 5th- 10th standard ke students ko bina books ke sabhi subjects padaate hain. Unka maanna hai ki students ko books tak bound nahi rakhna chaiye. Unhe har ek subject practically explain karna chaiye jis se wah poori tarah students ko samajh mein aa jaaye. Iss foundation mein wah Geography, History,Science jaise sabhi subject practical knowledge ke saath hi padaate hain. Ajinkya ke iss foundation mein 4000 se bhi jyada projects hain jinmein 500 projects sirf maths ke hain.

 

 

Ajinkya ne sabse kam umar mein sabse jyada patents apne naam karne ka record banaya hai. Saath hi ek hi din mein 4 patents apne naam karne ka record bhi Aijnkya ke naam par hi hai. Ajinkya ka naam Limca Book Of Record aur India Book Of Record Mein darz ho chuka hai.

 

 

Source 

 

Facebook Comments

Recommended For You

About the Author: Prachi Kulshrestha

Leave a Reply

Your email address will not be published.

%d bloggers like this: