2019 Mein Offline Market Mein Bhi Expand Karega Realme; Jaldi Hi In Stores Mein Bhi Available Honge Realme Ke Smartphones

Oppo ke sub-brand Realme ne kuch hi months pehle online exclusive devices ke saath shuruaat ki thi, lekin ab company offline market mein apni jagah mazboot karne ki planning kar rahi hai. Realme is samay India ke saath saath Vietnam, Malaysia, Indonesia, Thailand, aur Phillippines mein bhi budget smartphones launch kar chuka hai.

Realme ab offline market mein presence badhaane ke liye Reliance Digital se tie-up kar chuka hai. Saath hi company ka kehna hai ki, is saal mein Realme India ki 150 cities mein offline market mein bhi enter karega. Isi ke saath company ne ye bhi bataaya ki in cities mein 20,000 outlets naye khole jayenge aur in stores ka naam REAL Partners hoga.

Company sabse pehle 10 cities mein offline stores ki shuruaat karegi aur uske baad every quarter mein apne expansion plan mein 50 cities add karti rahegi. Realme ke in offline outlets mein aapke liye ab tak launch huye sabhi Realme ke phones available honge. Company ki in available smartphones ki list mein Realme 1, Realme 2, Realme 2 Pro, Realme U1 aur C1 shaamil hain.

Is samay Reliance Digital ke saath partnership ke baad, Realme ke ye sabhi smartphones all over India mein moujood 1300 Reliance Digital aur My Jio stores par bhi available honge.

Well, in sabhi smartphones ke alawa, company apne next budget smartphone Realme A1 ke launch ki taiyaari bhi kar rahi hai, jiske baare mein officially abhi koi announcement nahin ki gayi hai. Halaanki is smartphone ki images aur kuch specs zaroor leak ho gaye hain. Ummid hai ki is smartphone ka launch January 2019 mein hi ho jayega. Jiske baad logon ko Realme 3 ka bhi intezaar hai, jiski abhi koi bhi khabar nahin hai.

Facebook Comments

Recommended For You

About the Author: Pooja Choudhary

Leave a Reply

Your email address will not be published.

%d bloggers like this: